上屆世界盃殿軍兼歐洲國家盃亞軍，英格蘭照計高伊朗幾班。而從操盤手開到英格蘭讓一球/球半，相信都係信心滿滿。今場無謂拗頸，正頭正路揀個上盤。(星期二晚9時正)
32強B組當中，英格蘭無疑係出線大熱門。既係超級名牌球隊，目標一定係冠軍。難得同組對手唔強，令到英格蘭有機會利用呢三場分組賽去「磨刀」，推高狀態往冠軍進發。
今日有外地媒體爆料，領隊修夫基會排出主攻形4-3-3陣式。好明顯想爭取漂亮大勝，增強球員信心。可以預期英格蘭於分組賽會打得比較進取，尤其對手只不過係伊朗。
由前曼聯副練及皇馬領隊奎羅斯執教嘅伊朗，向來都係擅打穩守突擊。但用呢招對住英格蘭係咪有效，咁就真係有問號嘞。
再睇返伊朗近期於熱身賽或者世盃外圍賽，主要都係對二三線球隊。去到世界盃正本戲，首場就即刻面對級數高一截嘅英格蘭，對於伊朗絕對唔理想。再睇埋揭幕戰卡塔爾演出，似乎中東球隊今屆唔多掂，起碼今場對英格蘭唔易爆冷。
