由古代北非穆拉比特王朝入侵西班牙，到現代雙方就西撒哈拉領土問題、非法移民湧入等等，西班牙與摩洛哥嘅新仇舊恨，恩怨情仇，睇怕唔係一時三刻可以解決。今晚11點，世界盃16強淘汰賽摩洛哥對西班牙，唔單止為8強席位而戰，更為國家面子而戰。依家西班牙讓一球，揀上盤。
11世紀，穆拉比特王朝定都於摩洛哥馬拉喀什，極盛時期勢力範圍覆蓋塞內加爾、馬里、直布羅陀、西班牙及葡萄牙。阿拉伯勢力入侵西班牙，亦令西班牙語滲入大量阿拉伯詞彙及讀音；加上雙方宗教差異，令到西班牙對北非國度埋下仇恨。就算到現代，仍然就領土問題各執己見。縱然統治者都話有得傾，但分歧始終存在。而負面印象早就寫入人民基因。無論政治、經濟、甚或體育競技層面，西班牙都唔會輕易讓步。
實在雙方歷史上對賽過3次，西班牙取得2勝1和，唯一和局出現於2018年世界盃分組賽尾輪賽事，當時打和2比2。今次再喺世界盃碰頭，仲要係一場過定生死場合，相信實力較高嘅西班牙，都唔會畀摩洛哥有任何偷雞可能。
凌晨3點，葡萄牙就會鬥瑞士，而焦點當然係落喺C朗拿度身上。呢個流量密碼做乜都有人講，而見佢落到場仲好有火，好想爭取入球就知佢係葡萄牙關鍵人物。除C朗之外，葡國仲有唔少進攻好手，瑞士唔係咁易擋得住，簡單直接揀個葡萄牙齋W。
