世界盃分組賽D組賽事，突尼西亞對澳洲。講起今屆世界盃大悶戰，突尼西亞一定有份，佢哋頭場對住丹麥打和0比0，成班波完全無料到，控球指數已低過丹麥，全場仲只得1次攻門中目標。呢支非洲球隊質素有限，讓唔起澳洲平/半，揀下盤。(星期六晚6點)
澳洲首輪賽事對住強隊法國，因實力差距太遠，澳洲最終輸1比4可以理解。輸還輸，澳洲個別球員表現都唔錯，當中包括入球者古雲(Craig Goodwin)。呢個進攻球員唔單止名字好意頭，本身有速度有射術，係好有質素嘅澳洲球員，只係際遇平平無乜人識。
佢以前曾經外流到荷蘭鹿特丹斯巴達以及沙特球隊艾維達。無奈於當地唔受重用，出場唔多入球亦唔多。無限失落唯有返老家澳洲，於阿德萊德聯繼續踢波搵食。
或者人生經歷多咗，技術同心理質素都有好大進步，於澳職可謂重獲新生，更成為澳洲阿德萊德聯歷史上入球最多球員。而剛啱於世界盃入球，更令佢信心大增，希望協助到國家隊更進一級去到淘汰賽。
可以講，澳洲首輪輸畀法國係意料中事，大家唔使對賽果太在意。今次對住弱好多嘅突尼西亞，澳洲一定把握良機攞分，受讓平/半，下盤實在好吸引。 文:King Sir
