世界盃分組賽D組賽事，法國對丹麥。睇過法國首輪對澳洲，相信都知道呢支法國隊有幾勁，先落後反勝4比1。雖然傷兵多，但落到場一樣吊打對手。丹麥似乎仲未上力，好難頂得住法國。今場法國讓半/一，上盤必捧。
法國頭場超喪，一發力就大炒澳洲，其中一個原因係前線太屈。其中一個當然係麥巴比，佢推進時一至兩個守衛係擋唔住佢，澳洲球員踢踢吓直頭怕咗佢，麥總一上腳，澳洲就唔敢標波，一味後褪收窄範圍。
好嘞，當你跟得麥總咩，中間基奧特又多咗空位畀佢衝擊，正式係顧得個頭顧唔到個髻。或者丹麥班後防叻過澳洲少少，但係咪有能力擋住晒基奧特同麥總，真係話唔埋。睇漏一次都隨時瀨嘢。
再講，法國有傷兵問題跟身，所以畀班正選有更多時間休息係好重要。今場對丹麥最理想係砌低對手取兩連勝兼確保16強席位，咁去到分組賽尾輪就可以派副選落場。球隊情況反而令今場爭勝意欲提升，絕唔會同丹麥逗住嚟踢。
睇過丹麥對突尼西亞打成0比0，對前者表現實在失望。空有統計數字上優勢，換唔到正面賽果就證明仲有好多改善空間。縱然之前喺歐國聯，丹麥曾兩勝法國，但賽事唔同形勢亦唔同。如今去到世界盃呢個大舞台，丹麥都幾難重溫美夢。 文:King Sir
