繼續係世界盃8強賽事，今晚頭場由摩洛哥對葡萄牙。雙方於16強時踢得好精彩。摩洛哥靠穩守再以互射十二碼搞掂西班牙，戰術運用得宜值得鼓掌。
至於葡萄牙於收起C朗情況下，大炒瑞士6比1，後生仔干沙路拉莫斯成為熱搜人物。而睇完葡萄牙大勝，相信摩洛哥會更加側重於防務工作，估計今場於法定時間內入球唔會多，入球大細中位數2.5球，揀細盤。(今晚11點)
摩洛哥踢法唔養眼，但勝在夠實際。一心一意打防反，再加上少少運氣之助，成功走到8強當中。睇返摩洛哥今屆世盃賽事，從未被對手攻破大門，唯一失球係自己友艾加迪於對加拿大時擺烏龍。
以摩洛哥人腳，能展現出如斯強大防守能力確實值得尊重。鑑於葡萄牙剛賽大勝瑞士，預計摩洛哥一定諗好方法，盡量擋卻對手來犯，然後再等機會打反擊。
葡萄牙於16強將大明星C朗放入後備，確實令前場活力大增。唔敢肯定今場葡萄牙會點樣排陣，但遇到防守性極高嘅摩洛哥，葡萄牙要打得入對手都唔易。
唔少人都話，摩洛哥根本唔似非洲隊，踢法偏向歐陸式。亦相信呢種打法，會造成葡萄牙於進攻方面構成唔少阻力。最終，邊隊可以晉級4強真係要踢過至知，唯一可預計係入球應該唔多，細盤玩得過。
