世界盃季軍賽，由歐洲克羅地亞對非洲摩洛哥，兩支球隊都喺4強遇到大波士，級數有別，輸波都無話可說。
既然「克摩」依然家都無晒心理包袱，相信雙方都會以享受心態去應付今場比賽，入球數字偏高可以預期，入球大細中位數2.5球，捧大盤。(星期六晚11點)
有個數據值得一提，就係自1978年以來，季軍賽幾乎全部開大，只得上屆俄羅斯世界盃開細。縱然賽事性質係爭名次，但大家落到場都會放開心情，唔會踢得咁拘謹。
只要放得開，入球自然來。就算防守力極強嘅摩洛哥，或者係老鬼式踢法嘅克羅地亞，相信今場都唔會瘋狂落腳攔截，最緊要係安全完成賽事，健健康康返屋企休息。而部份球員於英超球隊效力，季軍賽更加會錫身，事關英超仲有聖誕快車賽期，無人想帶傷歸隊。
人腳方面就都幾難估計，皆因競爭性比較低，雙方都好可能派後備球員落場。特別係年輕球員，等佢哋可以儲吓level，為未來日子作舖路。總括嚟講雙方都唔會太著重防守，預期呢場波會比較有娛樂性，風格可能同之前幾場有好大差別。希望兩隊都識做入多幾粒，娛人又娛己啦！
