世界盃E組尾輪賽事，日本對西班牙；哥斯達黎加對德國。4支球隊都有機會出線，賽前形勢最惡劣係德國，因暫時只得1分兼得失球-1，要出線的話就需擊敗哥斯達黎加，兼西班牙贏日本。如西班牙打和又或者輸埋畀日本，咁就要計得失球，德國最低限度要淨勝哥斯達黎加兩粒先掂。簡單總結，德國唔止要贏，仲要贏得多。(星期五凌晨3時)
哥斯達黎加對德國，大會安排由法國女球證執法，亦係世盃歷史上首次出現。而無論派邊個做球證，都唔會影響德國強攻求大勝嘅意欲。
基於對手哥國同次席日本都有3分，哥國今場死守求1分，再望西班牙贏日本都可以出線。但以哥國嘅能力，未必頂得住德國。尤其首輪以7球輸畀西班牙，證明防守力麻麻。依家德國讓兩球半/三球，而齋W熱到1.06倍，兩瓣都揀唔落手。求有分頭可試吓半場入球大細，中位數1.5球，半場「大」有1.91倍。
日本對西班牙，之前已經提過「鬥牛國」打和都有機會晉級，輸波就睇「哥VS德」踢成點。估算西班牙唔會急於搶攻，大可睇住形勢發展，有乜依郁先至撳掣。以佢哋搓傳技術，日本未必做到太多攻勢，全場「細盤」係唔錯嘅選擇。
