世界盃分組賽H組賽事，南韓對加納。睇過哂兩隊首輪比賽，講真都幾精彩。南韓雖然同烏拉圭打和0比0，但全程無冷場，大家有來有往有攻有守。至於加納對葡萄牙就更加唔使講，雙方下半場大演入球騷。可以講南韓同加納都唔興縮住嚟踢，入球數字偏高可憧憬，中位數2.5，「大」盤有2.33倍可一試。
講南韓一定提到孫興民，頭場無波入唔緊要，有過一場熱身後相信狀態會有所提升。加上加納班守衛唔似得烏拉圭咁硬淨，變相可對孫仔有更大期望。
另外黃義助同埋10號仔李在城都做到攻勢，相信上述3個位置今場會有貨交。
加納最近以2比3輸畀葡萄牙，但當日加納真係踢得唔錯，特別係輸咗個十二碼後，成班波好似即刻開外掛，係咁推前同對手死過，有段時間都壓到葡葡牙縮得好後。所以話加納係有本錢有決心打積極波，對於開大盤會有幫助。
