世界盃8強其中一場重量級對決，歐洲荷蘭對南美阿根廷。呢對老對手喺世界盃經常碰頭，近期就有2006及2014年世界盃，而大家印象最深刻，應該係2014年世界盃4強，「荷阿」鍊足120分鐘都無交收，結果阿根廷以互射12碼勝出。
實在近兩次對賽，雙方都喺法定時間內打和0比0。估計今次再對賽都係拉鋸狀態，大膽少少揀「和」。保守啲的話，入球大細中位數2.5球，可以揀個「細」。(星期六凌晨3時)
話呢兩隊係歡喜冤家真係無錯，原來兩隊於身高各走極端。荷蘭球員平均身高達1米85，數值為8強之冠。咁8強裡面最矮就係阿根廷，平均身高為1米78。當然，足球世界身高並非一切。只係想講「荷阿」都有擅長之處，好難批死定邊個高啲。
人腳方面，相信阿根廷美斯必成焦點，佢弗起上嚟真係好堅。但若果荷蘭領隊「尹爺」搵條友專門搞美斯，隨時令阿根廷無咗重心。呢招唔係無見過呀，沙特頭場砌低阿根廷，就係沙特領隊半場訓話，大鬧球員唔係叫你同美斯映相。下半場發生乜事，相信大家都知道。
講波佬都有提過，南美球員攔截時全部都加辣，仲唔係十小辣，起碼都中辣。最明顯例子就係阿根廷對墨西哥，雙方踢到飛沙劈石。所以今場荷蘭想出波頂頭錘咩，阿根廷咪一腳飛埋嚟囉。剷得多，荷蘭都唔敢咁放肆。總括嚟講大家有計仔去頂住對手來犯，和波係唔錯嘅選擇。
