今屆世界盃最後一場賽事，阿根廷與法國爭冠軍。基於兩隊實力相當接近，今場和波賠率不足3倍。至於讓球盤一如所料開平手，阿根廷八折而法國十足。最搞鬼係讓球主客和，偏熱嘅阿根廷竟然係「+1」嗰邊，熱到得1.37倍。講真，揀邊隊贏確係唔易，不如揀個入球大細2.5球「大盤」。睇波買個大，有得嗌吓好過成日叫頂住咁辛苦。(今晚11點)
實在兩支球隊都好有攻力，先講阿根廷。除咗頭場輸畀沙特之外，打後咁多場都都起碼入2粒，於4強對克羅地亞更以3淨勝對手。
球王美斯當然犀利，今屆世界盃已有5個入球，而前鋒祖利安艾華利斯都唔好睇少，依家都有4個入球。阿根廷既有充足火力，去到決賽繼續採取主動都好正常。
法國情況與阿根廷都幾相似，除最後一輪分組賽出副選輸波外，其餘比賽都最少都2個入球。最有指標性係4強贏摩洛哥2比0。需知賽前摩洛哥無畀對手射破過大門，唯一失球都擺烏龍。但法國一樣能撕破摩軍防線，可見呢支上屆冠軍攻力有幾強。故此法國都唔會踢得太保守，一於利用自身長處進擊阿根廷。
之前提及美斯與祖利安艾華利斯，其實法國麥巴比及基奧特亦都一樣，分別取得5及4個入球，亦即係話呢4位球員最有機會爭今屆世界盃神射手。見到現時神射手賠率，祖利安艾華利斯及基奧特分別有10倍及13倍，細注一試隨時有意外驚喜。
特別係之前已押注麥巴比以及美斯嘅朋友，以祖利安艾華利斯及基奧特做套戥絕對合適。
