小休2日之後，世界盃8強淘汰賽正式展開，頭場由克羅地亞對巴西。睇過巴西點樣砌低南韓之後，真係唔到你唔服。你哋對住南韓，個個都踢到氣咳，森巴兵只需半粒鐘多啲已經奠定勝局，仲可以派後備門將出嚟玩吓刷紀錄。睇怕克羅地亞都好難擋得咁有霸氣嘅巴西。現時巴西讓一球/球半，揀上盤。
巴西4名進攻球員，包括雲尼素斯、尼馬、列察利臣同埋拉芬拿，今屆世界盃都好弗。當佢哋一有波在腳，對方守衛都好麻煩。
特別想講吓雲尼素斯，16強對南韓之時，雲尼素斯一上腳，有幾吓南韓球員都唔敢標前做截擊。相信呢個情況，會再次於今場對克羅地亞中發生。大家都知克羅地亞球員速度唔高，好難嘜得住呢位皇馬前鋒。你畀佢入到核心地帶，巴西就有好大機會造到入球。
克羅地亞以互射十二碼淘汰日本，贏還贏，但其實踢得好辛苦，球員體力付出唔少，真係擔心佢哋未回到氣。成日都有人話，4年前克羅地亞咪又係場場踢到加時，最終都入到決賽啦。但你都識講係4年前，依家又咪頂得住呢？
講真，克羅地亞今屆一路走來都無遇過真正強者，今晚對住爭標大熱門巴西，克羅地亞難免被睇淡。
