連同4強、決賽及季軍爭奪戰，今屆世界盃只剩低4場賽事。而星期三凌晨，阿根廷及克羅地亞將合演4強大激鬥。兩支球隊風格唔同，但計實力真係差唔多，克羅地亞受讓半/一，揀下盤。
今場焦點，當然落喺一對好波之人，美斯以及莫迪歷身上。4年前於俄羅斯世界盃，雙方就於分組賽碰頭，當時克羅地亞大勝3比0。當然，對賽往績只係參考，更為睇重係克羅地亞沉實穩健式踢法，確實令唔少對手吃苦頭。
最明顯例子就一定係8強對巴西，話知你巴西有幾多進攻好手，製造到幾多埋門，克羅地亞都能夠悉數化解，90分鐘法定時間同巴西打和0比0。可以講克羅地亞打法真係唔悅目，某程度偏悶，但勝在夠實際，成班中佬勝在經驗豐富，好少出現嚴重失誤，阿根廷今場唔容易咬得入佢哋。
阿根廷能夠走到入4強，除了美斯表現好，都要多謝班隊友幫手跑動，先令佢有發揮空間。講到跑動，左翼衛阿古拿就係其中1個最唔錫力嘅阿根廷球員。奈何呢隻矮腳虎停賽，或多或少會對阿根廷造成影響。值得補充，阿根廷於淘汰賽階段，連續2次讓波都開唔到上盤，對手包括澳洲及荷蘭。今次對手係克羅地亞，下盤係唔錯嘅選擇。
