世界盃分組賽G組賽事，非洲喀麥隆對塞爾維亞。同組巴西砌爆塞爾維亞後，相信出線16強都無阻力。所以今場「喀塞」雙方一定大打真軍，力爭另一晉級席位。若果以頭場去比較，喀麥隆堅係弱雞好多，故此揀個塞爾維亞齋W，有1.6倍。(星期一晚6時)
講起喀麥隆，於世界盃都留低過唔少美麗回憶，好似米拿大叔、入球王伊杜奧等等。本來前鋒阿保巴卡都幾好，但剛啱對瑞士，領隊桑治只於比賽尾段先派佢出場，踢落又唔覺太勁。而另一個問題係喀麥隆團隊合作性較低，成日都係靠衝靠湧。塞爾維亞個個大件頭，唔係咁易撞得入。
塞爾維亞人腳唔差，全部效力英意西德聯賽。而且老中青球員都有，其實相當之均衡。頭場輸畀巴西，全因對手個人能力太強。今次遇到質素低一截嘅喀麥隆，相信塞爾維亞會有唔同演繹。
特別要提出，前鋒拉賀域以及米杜域都係model身高，前者1米9，後者1米89。塞爾維亞於高空攻勢方面，會佔得好大優勢。當然，打唔打高空轟炸就留畀領隊史杜高域決定，但起碼係塞國其中一項殺著。
