C朗世盃旅程終結，周六晩8強戰，佢以後備身份上陣，但未能協助國家隊扭轉敗局，葡萄牙輸0:1，摩洛哥成為史上首支打入4強嘅非洲球隊。
37歲，C朗無疑已完成人生最後一次世界盃，完場笛響起，佢即時步入球員通道，哭成淚人，對一個傲視球壇近20年，一直企於高峰嘅超級巨星，最後一戰後備登場，未能完成自我救贖，卻只能黯然離場，無疑係傷感結局。
葡萄牙雖然有好好嘅人腳，但進攻模式單調，係爆冷出局主因；摩洛哥值得4強席位，由分組賽開始，除有鋼鐵防守，反擊亦做得極度出色，最重要係球員團結有士氣，得以創造非洲奇跡。
葡萄牙今場繼續收起C朗，用番上仗對瑞士大演帽子戲法嘅干卡路拉莫斯做中鋒，拍祖奧菲歷斯、般奴費南迪斯攻堅。
葡萄牙喺開波初段表現唔錯，祖奧菲歷斯飛頂好有威脅，但畀對手門將救出。之後摩洛哥企穩陣腳，發揮嚴密防守之餘，亦開始發動突襲，戰至42分鐘更先開紀錄。
左路高波傳中，葡萄牙門將迪奧高哥斯達出迎時間錯晒，畀摩洛哥中鋒摩尼斯利頂成1:0。般奴費南迪斯之後窄位妙射，中楣唔入，葡萄牙半場落後。
51分鐘，C朗終於出場，同出擊力強嘅後衛祖奧簡些路後備入替，增加攻擊能量。
但C朗出場，並未能為葡萄牙帶嚟起色，面對以効力歐洲球會為主嘅摩洛哥嚴密防線，基本上欠缺實際威脅，只有祖奧菲歷斯射門最致命，但又畀西維爾門神耶辛尼保奴精彩撲出，C朗補時近射亦被救出。最終葡萄牙輸0:1出局，C朗亦寫下佢足球生命世盃休止符，註定同最高榮譽絕緣。
摩洛哥創造歴史，周四凌晨對英格蘭或法國，爭入決賽，力爭為非洲球隊創造更大奇跡。
