'

【世盃賽後】C朗做後備 造就小將童話!干卡路帽子戲法 葡萄牙大炒瑞士入8強

記住呢個名,干卡路拉莫斯(Goncalo Ramos),小將書寫世盃大童話,代替C朗,首次做國家隊正選,個人連中三元,帶領葡萄牙6:1大炒瑞士,入8強對摩洛哥。

葡萄牙領隊費蘭度山度士,作出收起C朗嘅賭注,結果大獲全勝。干卡路出現,確實令前線活力大增,打出漂亮進攻足球。雖然未知老帥下場點玩,但多一張好牌在手,對葡萄牙絕對係一大好事。

對瑞士咁重要嘅賽事,C朗竟然冇份踢正選,正路解讀,分組賽狀態唔好,所以先做後備;但更多揣測,係佢上仗對南韓,下半場中段被換出時態度差劣,令領隊費蘭度山杜士不滿,作出懲罰。

前鋒位置,由賓菲加球員干卡路拉莫斯取代,拍般奴費南迪斯、祖奧菲歷斯。干卡路只有21歲,今仗之前,只為國家隊上陣過35分鐘,第一次做正選,就係今場世界盃16強。

雖然瑞士初段佔據主動,但到17分鐘,畀葡萄牙先開紀錄,入球者正係干卡路!佢禁區內以身型壓過瑞士後衞,轉身狂抽入網。

干卡路上月熱身賽對尼日利亞,先至首次為葡萄牙上陣,後備上陣入一球。喺世界球壇,佢未算係超級球星,今仗出人意表代替C朗,竟然有一個夢幻開局。

小將威完,輪都輪到老大哥,中堅比比33分鐘接應角球頭槌破網,2:0。已經39歲,比比呢球表現嘅彈跳力,直情係C朗級數。

瑞士今場防守未如以往緊密,為反攻露出更多空位,令小將童話得以延續,干卡路51分鐘接應達洛治傳中撞入,梅開二度。干卡路入波後,鏡頭影到C朗笑得好開心,拉菲爾古里路之後藉一個美妙組織射成4:0,C朗都係笑容滿面,完全冇為做後備黑面。

瑞士稍後扳回一球,但干卡路67分鐘單刀入波,完成帽子戲法。現場球迷不斷呼喊C朗名字,巨星喺73分鐘終於出場,食咗個越晒大位嘅詐胡,未能增加個人入球紀錄。另一後備前鋒拉菲爾尼亞奧,則喺補時射入世界波,葡萄牙顯示出應有嘅強大攻力,贏6:1晉級。

16強打完,嚟緊8強秩序:
上線
周五晚11時:克羅地亞 vs 巴西
周六凌晨3時:荷蘭 vs 阿根廷下線
周六晚11時:摩洛哥 vs 葡萄牙
周日凌晨3時:英格蘭 vs 法國

圖片來源:BR