【世盃賽後】1:4遭克羅地亞反勝 加拿大取得世盃史上第一球！從無退縮 輸波贏掌聲！

加拿大兩戰皆北，但仍值得各位捱眼瞓睇波嘅球迷畀掌聲！下屆世界盃主辦國之一嘅加拿大，啱啱再以1:4遭克羅地亞反勝，繼上仗0:1不敵比利時後再輸一場，正式宣佈無緣晉級，不過佢哋高速、主攻嘅踢法，成為今屆沉悶賽事嘅清泉之一，希望往後呢4年佢哋累積更多經驗、下屆走得更遠。

加拿大今場閃電開紀錄，王牌艾方素戴維斯接應右路傳送，無人看管下頂入，1分8秒，除咗成為今屆世界盃最快入球，呢個亦係加拿大世盃史上第一球。

不過，加拿大始終以年輕人為主，缺乏大賽經驗，領先後繼續搶攻，可惜佢哋把握力始終稍遜，正中老謀深算嘅克羅地亞下懷，26分鐘，克羅地亞老牌鋒將卡拉馬歷，已經入咗球詐胡，敲響警號。

論個人經驗同質素，當然以克羅地亞較佳，36分鐘，係你嘅始終係你，卡拉馬歷接應比列錫靚傳，窄位破網、追成1:1，完半場前，利華查轟入反先一球，克羅地亞反勝2:1。

換邊後加拿大繼續高速喪攻，可惜薑係老嘅辣，克羅地亞拖慢節奏，令加拿大得個急字，70分鐘同補時階段，畀卡拉馬歷同馬查亞錦上添花，贏4:1完場。

F組第二輪已經踢完，克羅地亞、摩洛哥同得4分，克軍因得失球佔優排榜首，比利時3分，加拿大0分提早畢業。F組最後一戰，克羅地亞對比利時，兩位中場大師莫迪歷、奇雲迪布尼大鬥法。