'

【世盃賽後】1:1逼和狂牛 E組形勢大混亂!德國出線要靠西班牙 安歷基揚言會幫手

E組生死戰,上仗畀日本爆大冷反Cup嘅德國,惡鬥強勢嘅西班牙,由於日本喺早場倒灶不敵哥斯達黎加,令德國重燃出線希望,「日耳曼兵」今場總算回復水準,最終1:1逼和西班牙,將出線懸念帶入最後一輪分組賽。

德國今場稍為變陣,收起夏維斯,用湯馬士梅拿打正前鋒,基拿比、穆斯亞拿支援,3人中場為根度簡、甘美治同哥列斯卡。

德國喺比賽初段稍為捱打,不過去到上半場中段已搶番唔少攻勢,魯迪加更曾經食咗球詐胡,換邊後西班牙憑後備殺手摩拉達快腳射入,領先1粒,德國喺呢個時候殊死一戰,去到83分鐘,後備上陣嘅富克洛抽入還魂波,最終逼和對手1:1,執番1分。

西班牙錯失贏波提早出線嘅機會,令到E組形勢極度混亂:

E組
西班牙2110814
日本2101223
哥斯達黎加2101173
德國2011231

目前形勢,西班牙喺最後一場對日本,只需要1分已可出線,除非哥斯達黎加贏德國,否則西班牙甚至拎1分,都好大機會係首名。

而日本自爆後,最後一輪對西班牙形勢極度凶險,贏波當然出線,如果和波就有4分、得失球差為0,另邊廂德國只要贏哥斯達黎加兩球、就可以出線,就咁睇牌面,日本似乎係要再踢出一次奇蹟,砌低西班牙先穩陣。

點都好,德國想出線就要睇西班牙面色,而西班牙領隊安歷基亦好識玩,喺賽後講明唔會放生日本之餘、仲暗串德國:「德國唔使關心我哋㗎喇,佢哋自己專注贏哥斯達黎加先啦,我哋會派最強陣容、砌低日本,以首名出線。」