'

【世盃賽後】雙特有傳人!英格蘭6:2大勝伊朗 雙核弗到你唔信 19歲比寧咸踢出巨星格

咁至係世界盃,8個入波呀!B組首仗,英格蘭盡顯霸氣,6比2大勝伊朗。19歲零145日嘅祖迪比寧咸,首度參戰決賽周,即顯示巨星潛能,同雙防中拍檔迪格蘭賴斯,成為賽事揸弗人。

英格蘭領隊修夫基,出征前大受抨擊,今晚呢場大勝,挽回外界唔少信心。英格蘭強陣喪攻,後衞捷比亞、史東斯、麥佳亞、勞基疏爾,雙防中迪格蘭賴斯、比寧咸,史達寧、美臣蒙特、布卡約沙卡做攻擊中場,支援哈利卡尼。

伊朗由前皇馬、葡萄牙主帥奎羅斯執教,佢更為人熟悉係曼聯最輝煌時代,長期出任費格遜左右手。佢今仗擺全防守陣容,出大量防守球員,擺明先求不失,有機會先打反擊偷雞。伊朗其中一個反擊絕招,係龍門比蘭雲特嘅超遠程手球,但佢開波初段已傷出,令球隊失去一個反攻招數。

奎羅斯如意算盤完全打唔響,除縮得太後,令有耐性嘅英格蘭球員越搓越順外,英軍雙防中打出超高水準,更令伊朗無法抵擋。

賴斯中場攔截晒,令麥佳亞安枕無憂;祖迪比寧咸更完美演繹攻守聯繫角色,令人擊節讚賞。正係呢位多蒙特中場,於35分鐘殺入禁區,接應勞基梳爾靚傳,以頭槌先開紀錄。

比寧咸大放異彩。

伊朗先失後焗住反攻,但欠缺攻擊球員,兩頭唔到岸之下,畀布卡約沙卡、史達寧各建一功,半場輸至0:3。

伊朗下半場將防線推上,攞番些少攻勢,但亦畀英格蘭更多進攻空間,布卡約沙卡62分鐘梅開二度,雖然達利美65分鐘為伊朗破蛋,但舒拉福特後備入場50秒,又為英格蘭射成5:1。

勝局已定,英軍大量換人,哥連威爾遜、菲爾科頓都有上陣機會,顯示中前場板櫈深度。完場前又係比寧咸,再次成功攔截後送出靚長傳,哥連威爾遜窄位半單刀,唔貪功傳交基亞利殊,輕易射成6:1;伊朗補時藉12碼,最後輸2:6完場。