阿根廷4強戰，意想不到輕易地勝出，美斯貢獻入球助攻各一，3:0擊敗克羅地亞，繼2014年後再度打入決賽，周日晚同法國或摩洛哥爭冠軍。
最後一次世界盃，最後一場決賽，美斯有最後機會追及比利、馬納當拿歷史地位，今仗射入一個12碼，暫有5個入球，同麥巴比並列神射手榜首，如能冠軍、神射手兼得，無疑係最璀璨終局。
克羅地亞捱過兩場加時戰，體力較輸蝕，防守部署亦出問題，上半場已呈敗局，冇得返轉頭。最後盛讚特別要畀莫迪歷，37歲，攻守兼顧，盡顯卡士。
仲差一步入決賽，今仗自然踢得更謹慎，去到25分鐘，幾乎連一個攻門都冇。防守不可恥，最緊要有效，克羅地亞上仗打足120分鐘，只有一個中目標射門，已經可以將比賽帶到互射12碼，繼而淘汰巴西。今仗依然以控球為主，想控制節奏，但防線比起之前對日本、巴西時都推得較上，露出唔少空位，結果鑄成大錯。
阿根廷中前場球員速度快，睇準對手防線谷得太上，34分鐘發動極速反擊，曼城小將祖利安艾華利斯單刀，被克羅地亞門將利華高域撞跌，搏得12碼，美斯主射勁抽掛網。
克羅地亞落後，又再谷上啲，5分鐘後輸多球，又係一個人多打人少反擊，祖利安艾華利斯今次自己搞掂，近門射成2:0。
打咗兩場加時，體力已下降，強攻又係弱項，要克羅地亞追兩球，根本難過登天，阿根廷睇定嚟食，75分鐘再入多球。
美斯個人表演時間，右路又扭又推又轉身，玩殘對手後衞，最後底線傳中，祖利安艾華利斯近門射成3:0。
作為真正球王，唔一定要入波，除咗射入12碼及精彩助攻，美斯全場不停奔跑，努力參與防守，全心為球隊奉獻。周日晚上，無論對法國或摩洛哥，期待佢再有精彩演出，為球迷呈獻一場經典決賽。
