衞冕冠軍法國出擊，D組首戰以4:1大勝澳洲，基奧特梅開二度，用表現話畀大家知，佢仍然有能力代替賓施馬。但唔駛咁快吹咁大，因為澳洲真係好弱雞，要睇埋之後對丹麥、突尼西亞，先至知法國真章。
雖然有簡迪、普巴、賓施馬等球星未能參戰，但法國仲有唔少星級球員，對住澳洲更充滿信心，擺出超攻擊陣式。基奥特做單箭頭，麥巴比、奧士文尼迪比利強力支援，加埋仲有個基沙文，開波即左右路開弓，連環施襲。
雖然9分鐘畀澳洲前鋒奇治奧雲偷襲得手，先失一球，但法國由麥巴比、迪比利不斷快速突破，令澳洲防線難以應付；防中拉比奧特先以頭槌扳平，基奧特以個人國家隊第50個入球，為法國後來居上。
澳洲今屆人腳未夠水準，攻守都頗弱，下半場繼續捱打，進入麥巴比表演時間。佢先接應迪比利傳中頭槌破網，跟住又發揮招牌爆發力，左路落底傳中，造就基奧特取得第51個國際賽入球，同亨利並列法國隊史上第一射手。
雖然首戰即大勝立威，但左閘盧卡斯靴南迪斯喺一次防守中受傷，賽後證實十字韌帶撕裂，緣盡世界盃。
D組另一場首輪賽事，丹麥0:0和突尼西亞。兩隊全場均勢，雖然欠缺足夠鋒力，但防守紀律一流，發揮穩守突擊戰術，同法國絕對有得踢。
第二輪賽事，周六晚6時突尼西亞對澳洲，周日凌晨零時法國對丹麥。
