'

【世盃賽後】邊個可以搞掂麥總?強爆入兩粒 法國2:1勝丹麥 破咒第一隊入16強!

又係麥總呀!麥巴比繼續強勢,周日凌晨D組第2輪,包辦兩個入球,2比1擊敗丹麥,法國兩戰6分打入16強。同組澳洲1比0挫突尼西亞,晉級形勢暫時佔優。

法國用番上仗贏澳洲嘅陣容,麥巴比、基奧特、基沙文繼續配合良好,製造多個攻勢,丹麥全靠門將卡斯柏舒米高救出多個險球,上半場保住不失。

61分鐘,麥巴比同左後衛迪奧靴南迪斯一次美妙配合,麥總再近門射入,令法國取得應有嘅先開紀錄。但領先後稍為鬆懈,7分鐘後即被安達斯基斯坦臣扳平。丹麥之後氣勢大盛,曾有兩個危險攻門,可惜未能把握。

中前場球員質素成為勝負關鍵。法國度過危險時刻,86分鐘奠定勝局,基沙文右路超級靚傳,麥巴比近門用大脾撞入,法國贏2比1,衛冕冠軍之路行前一步。

麥巴比嘅爆發力,仍然冇人頂得住,狀態好兼有飢渴感,計埋上屆,佢喺決賽周已連續3場為法國隊入波,上次可以做到呢個成績嘅法國國腳,係上古大神方亭。

麥總決賽周已共入7球,成為法國No. 2,方亭以13球排第一位。佢亦係繼比利之後,成為歷史上第2位喺24歲前,取得至少7個決賽周入球嘅球員。以麥總目前勇態,紀錄勢必一直破,今屆已有3個士哥,向金靴奬全面進發。

同組另一仗,澳洲賽前雖稍被睇淡,打落形勢亦唔及突尼西亞,但雙方攻力都疲弱下,把握一個機會已足夠。

前鋒米歇爾杜基於23分鐘銅頭一搖,取得全場唯一入球,為澳洲全取3分。杜基係今屆世界盃首位入波嘅次級聯賽球員,佢效力日本J2聯賽球隊岡山綠雉。

杜基一箭定江山。

澳洲憑呢個入波,終結決賽周7場不勝走勢,時隔48年再次喺世界盃上完成零封。今次係澳洲決賽周歷史上第3勝,之前兩場勝仗,出現於06年分組賽3比1贏日本、10年分組賽2比1贏塞爾維亞。

至於法國成為首支晉級球隊,亦打破衞冕冠軍魔咒,前3屆衞冕球隊(意大利、西班牙、德國),都喺跟住嗰次賽事分組賽出局。法國最後一輪對只有1分嘅突尼西亞;澳洲有3分,將決戰1分丹麥。如果突尼西亞贏唔到法國,澳洲和波已夠出線。

D組
法國2200626
澳洲2101243
丹麥2011121
突尼西亞2011011