有強力攻擊手唔用，又有球隊因為衰保守，招致敗局，今次輪到南韓，H組第2輪賽事，浪費應有強大攻力，2:3不敵加納，出線機會大受打擊。
上仗和烏拉圭0:0，攻力頗為疲弱，今場中前場作大變動，只保留孫興民，用全北汽車曹圭成打單箭頭，另外出埋鄭優營、權昶勳。
一開波南韓主動展開攻勢，但欠缺具威脅射門，都係外圍騷擾，入唔到肉，孫興民狀態唔弗，前線隊友質素、侵略性都不足，對老孫欠缺支援配合，浪費晒曹圭成嘅空中威力。
加納上仗雖然2:3負葡萄牙，但表現絕唔失禮，今場用穩守突擊，引南韓出洞，上半場效果完美。阿仙奴中場湯馬士柏堤築起第一道防線，應付南韓前鋒綽綽有餘。
加納上半場3次射門，2次轉化為入球，效率夠高。24分鐘，効力水晶宮嘅阿休左路開角球，加納球員身材有優勢，造成混戰，修咸頓中堅沙利素近門射成1:0。
南韓縮得太後，令加納長傳容易打入危險地帶，34分鐘，又係阿休左路傳中，阿積士中場古達斯由後柱攝前，巧妙頭槌跣入網，令加納領先2:0。
南韓領隊保羅賓杜，見上半場進攻模式死板，下半場改用雙翼陣，換入羅相浩及李康仁，特別係効力馬略卡嘅李康仁，被視為南韓繼孫興民後最優質嘅攻擊球員，佢出波質素高，唔打正選非常嘥料。
高質即係高質，果然李康仁出場只有1分鐘，58分鐘即喺左路傳出靚波，畀中鋒曹圭成頭槌破網。曹圭成効力全北汽車，身材高大，61分鐘施展泰山壓頂，再用頭槌扳平2:2。如果早有李康仁同佢配合，南韓上半場形勢唔會咁惡劣。
加納被扳平後又再組織攻勢，今場效率真係超高，下半場第一次攻門又入波，一輪流暢配合，由左路傳至遠柱，古度斯梅開二度，射成3:2，加納再領先。
南韓換入埋另一中鋒黃義助，同曹圭成展開瘋狂轟炸，但加納始終頂得住，贏3:2完場，2戰得3分，最後一輪分組賽對烏拉圭。
南韓2戰只得1分，出線危機深重，下仗對葡萄牙，只得贏波一途，仲要睇另外一仗戰果。明明有隻「紅色轟炸機」曹圭成，但唔去到絕境，都唔出李康仁，真係浪費到極。喺呢方面，保羅賓圖同唔出三笘薰嘅森保一，都要為輸波負上責任。
