澳洲迎來該國足球史上另一光輝時刻，D組最後一輪賽事，爆冷贏丹麥1:0，兩戰6分，同法國攜手出線，袋鼠兵團繼2006年後再入16強。
澳洲喺外圍賽表現都幾差，好掹水先出到線，被視為決賽周最水皮嘅「亞洲」代表，但球員打氣波，體力士氣彌補質素差距，先贏突尼西亞，再喺被全面被睇淡下擊敗丹麥，成為今屆首隊出線嘅「亞洲足協」代表。
而且同06年出線相比，今次陣中冇卡希爾、基維爾、舒華沙等高質大球星，純粹靠球員整體努力，更凸顯難能可貴。
最後一輪，賽前形勢混亂，只有法國兩戰6分，打和都肯定首名出線，領隊迪甘斯大輪換，畀多位主力休息，麥巴比、基奥特、基沙文、洛里斯、拉比奧特、迪奧靴南迪斯等全部收起做後備。
突尼西亞賽前得1分，必需要贏先有價講，見到法國弱陣咁著數，自然把握機會全力主攻，去到58分鐘，前鋒卡斯里射成1:0，出線佔先機。
另一邊澳洲賽前3分，如果突尼西亞唔贏，和都可以出線，1分嘅丹麥則必需要贏。澳洲主要防守，但突尼西亞58分鐘領先1:0後，變咗要贏先得，結果又真係畀佢哋喺60分鐘，由「三朝元老」中鋒馬菲歷基藉一個突擊，個人表演射成1:0，呢個時刻又輪到澳洲出線，最終順利守到完場，次名晉身16強。突尼西亞亦贏法國1:0，但輸畀澳洲成關鍵，黯然出局。
以丹麥上年歐洲國家盃及外圍賽嘅表現，冇咩人會諗到佢哋出唔到線，而且仲要係1和2負包尾，亦係該隊決賽周歷來最差嘅成績。前鋒乏力係死症，艾歴臣、卡積亞等主力年紀大，似乎亦到換代之時。
法國、澳洲周日會踢16強，對手係C組次名及首名，咦，法國有冇機會對阿根廷⋯⋯？
| D組 | 賽 | 勝 | 和 | 負 | 得 | 失 | 分 |
| 法國 | 3 | 2 | 0 | 1 | 6 | 3 | 6 |
| 澳洲 | 3 | 2 | 0 | 1 | 3 | 4 | 6 |
| 突尼西亞 | 3 | 1 | 1 | 1 | 1 | 1 | 4 |
| 丹麥 | 3 | 0 | 1 | 2 | 1 | 3 | 1 |
