未對摩洛哥前，有人問奇雲迪布尼，比利時有冇機會爭冠軍？佢斬釘截鐵咁話：冇！我哋太老啦！
迪布尼冇講大話，黃金一代真係變黃昏一代，同4年前攞季軍嗰隊已經完全唔同，佢哋喺F組第2仗，0:2不敵摩洛哥，莫講話爭冠軍，連出線都成問題。
比利時上場對加拿大，十足老鬼對年輕人，全場畀加拿大圍揼，對手仲要晨早射失12碼，最終比利時贏1:0，真係大話夾好彩。
今場比利時依然老鬼為主，共有7個正選年齡超過30，領隊馬天尼斯唔夠吉士，好似夏薩特，孭住個肚腩，完全冇活力，點解唔用弗到爆、効力白禮頓嘅杜沙特做正選呢？起碼有活力，可以幫到迪布尼，唔駛助攻王孤軍作戰。
摩洛哥打穩守突擊，對手攻力欠鋭利，守得住有餘。車路士前鋒薛耶治喺上半場尾段，曾喺右路側邊直彎自由球入網，雖然隊友越位在先食詐胡，但已對比利時發出警號。
見比利時冇料到，摩洛哥下半場增強主動性，攻勢越見入肉。夏薩特60分鐘先至被換走，由梅頓斯入替，真係畀足面。
比利時攻門乏力，到73分鐘仲輸埋，入替主力阿舒拉夫嘅沙比尼，學咗薛耶治嗰招，右路自由球直射近柱入網，古圖爾斯終於失守。
輸波後比利時盡出武器，呢個時候先至出杜沙特，遲唔遲啲呀！情況就如日本領隊森保一，唔最危急都唔出杜沙杜嘅白禮頓隊友三苫薰，根本冇足夠時間畀佢哋發揮。
連有傷嘅盧卡古，最後階段都出埋，但攻唔入之餘，仲畀摩洛哥藉92分鐘一個快攻，由另一後備薩卡利亞射成2:0完場。
摩洛哥成功爆冷，球員莫名興奮，跪地感謝上蒼，畢竟今次係該國繼86年後，第一場決賽周勝仗，足足等咗36年。
克羅地亞未對加拿大前，摩洛哥4分升上榜首，最後一輪對加拿大；比利時3分，決戰克羅地亞，隨時係黃金一代世盃告別作。
