森保一究竟係神？定係符碌？E組最後一夜峰迴路轉、刺激精彩，日本對西班牙，又係半場落後，又係下半場憑後備奇兵反敗為勝，創造首名出線奇跡。西班牙則以次名殺入16強。
同組有歐洲兩大勁旅，決賽周展開前，日本出線機會被全面睇淡，結果佢哋爆冷連贏德國、西班牙。德國雖然4:2挫哥斯達黎加，同西班牙同得4分，但輸得失球差，難逃連續兩屆分組賽出局厄運。西班牙第一仗7:0大炒哥斯達黎加，最後時刻起關鍵作用。
賽前形勢，西班牙4分，日本、哥斯達黎加同樣3分，德國只得1分。由於德國只要贏哥斯達黎加兩球或以上，日本隊和波都要出局，所以基本上，日本係要爭取贏波。
不過，森保一貫徹始終，繼續先收起三苫薰、堂安律、南野拓實、淺野拓磨4個最強攻擊手，用嫌田大地、前田大然、久保建英打3前鋒，當然欠缺威脅，令西班牙放膽控傳進攻，11分鐘由莫拉達近門頂成1:0。
又係呢招，換邊後調入三笘薰、堂安律，複製反勝德國方程式，結果又真係畀森保一搏到，奇跡再次出現！堂安律48分鐘藉西班牙後防出錯，禁區外勁射破網扳平。
51分鐘，三笘薰喺個波疑似出咗底線下，撈番埋入中路，田中碧近門撞入，日本戲劇性反超前。西班牙如夢初醒，急起反攻，但日本球員發揮熱血本色，死守到底，得到最高含金量嘅晉級資格。
日本上仗打保守波，結果輸畀哥斯達黎加，森保一由天堂跌落地獄，如今佢又重返天堂，原來佢係專砌世界級強隊，真係吹佢唔脹，日本球迷又要道歉咯！
另邊廂哥斯達黎加對德國，戰情一樣咁激。基於德國非勝不可，甫開場已瘋狂搶攻。9分鐘，德國10號仔基拿比，迎頂翼衛拉姆傳中成1比0。縱然德國保持強攻，但哥斯達黎加防守出色，化解唔少危機，半場德國以一球領先。
下半場係戲肉所在，雙方加快節奏鬥攻。58分鐘，哥迪捷達追平成1比1。哥國入球後信心爆燈，70分鐘再憑祖安華加斯反超前成2比1，搞到另一場歎緊慢板嘅西班牙，突然陷入出局邊緣。
德國於劣勢中掙扎，唯有全軍進攻放手一拼。73分鐘，德國一樣靠後備入場球員建功，前鋒夏維斯連入兩球反超前，補時1分鐘，富卻古再入多粒成4比2，不過都無用，最終都係提早玩完，連續兩屆分組賽出局。
日本首名出線，下周一晚11點對克羅地亞；西班牙驚險晉級，但次名仲着數，16強對手係摩洛哥，下周二晚11時舉行，如果入到8強，亦避開咗極有機會係G組首名嘅巴西。
