'

【世盃賽後】賽前爆喊 自導自演12碼 連續5屆世盃入波創歷史!C朗又做主角!葡萄牙3:2險勝加納

死亡H組名不虛傳!葡萄牙下半場憑C朗、菲歷斯及拉菲爾利亞奧建功,以3:2力剋加納,C朗賽前爆喊、門前失機、再射入12碼,創出連續5屆世盃都有入波嘅紀錄,再一次話畀大家知,佢命中注定係球場上嘅主角!

葡萄牙、加納、烏拉圭同南韓被編入H組,4支球隊都有一定實力,早場烏韓互交白卷,而葡加戰喺上半場亦係窿窿,正當以為入球又偏少之際,下半場就嚟個極級高潮。

開賽前C朗唔知係咪一時感觸,喺播國歌嗰陣流下男兒淚,佢今場拍住祖奧菲歷斯攻堅,般奴費南迪斯、貝拿度施華墮後支援,對面嘅加納就擺超保守陣式,伺機偷襲。

葡萄牙喺上半場佔盡優勢,C朗喺開賽冇耐就有個單刀機會,可惜佢把握唔到,之後雖然顯示其驚人彈跳力,可惜頭槌攻門又唔中目標,去到上半場中後段,亦因犯規在先而食詐胡,半場雙方打和0:0。

下半場高潮迭起,C朗喺禁區內被踢跌、博到12碼,佢自己親自操刀,不停深呼吸、頂住壓力破網,成為世界盃史上第一位連續5屆有入波嘅球員。可惜開心咗唔夠10分鐘,加納王牌安迪阿休近射得手,扳平1:1。

心雄嘅加納諗住谷,點知葡萄牙一次反擊,菲歷斯接應般奴靚傳建功,葡萄牙再一次領先,後備落場嘅利亞奧,仲整個亨利式攞遠柱靚波,葡萄牙贏到3:1。

諗住定個抬油,點知加納卻發揮打不死精神,保卡利頭槌先追成2:3,完場前恩歷克威廉斯更乘葡萄牙門將哥斯達犯錯,成功打荷包、幾乎扳成平手,好彩葡萄牙守將即時回防,化險為夷,最終葡軍驚險全取3分。

葡萄牙目前喺H組以3分帶頭,南韓、烏拉圭1分。葡萄牙下場會對烏拉圭,開波時間係下星期二凌晨3點。