【世盃賽後】荷蘭橙揸極唔出汁 1:1和波 厄瓜多爾失2分！卡塔爾首隊玩完 起咁靚球場把鬼！

周五晚A組完成第2輪賽事，荷蘭1:1和厄瓜多爾，演出繼續令人失望，好在抽中弱組，入16強機會仍高，如果放喺另外組別，恐怕分組賽已出局。卡塔爾率先玩完，起幾靚球場都冇用！

荷蘭上仗雖然靠完場前入波，2:0挫塞內加爾，但表現平平無奇。最強前鋒迪比有傷，只能做後備，用阿積士前鋒貝雲積做正選，攻力徹底削弱。

受曼聯垂青嘅飛燕諾主力加普，上仗為荷蘭先開紀錄，今仗更推前一格打正前鋒，6分鐘又有波入，藉厄瓜多爾後衛未入局，禁區外勁射靚波破網。

荷蘭雖然領先，但中前場球員質素、配合都未如理想，只靠5後衛支撐；反觀厄瓜多爾落後之下，開始壓上，以快速走位傳送，㩒住荷蘭狂砌，並喺下半場4分鐘扳平。

唔止扳平，仲創造歷史，入球者再次係安拿華倫西亞。呢位33歲、効力費倫巴治前鋒，包辦厄瓜多爾戰決賽周以來全部6個入球，真正王牌中嘅王牌。

計埋安拿華倫西亞，世界盃歷史上，只有4人能包辦球隊連續6個入球，其他3位係沙蘭高（俄羅斯1994）、羅斯（意大利）1982）、尤西比奧（葡萄牙1966）。

安祖華倫西亞完場前傷出，希望唔影響最後一輪賽事，最終兩隊打和1:1，都係兩戰得4分。

另一仗塞內加爾3:1輕取卡塔爾，令東道主成為今屆首支出局球隊。卡塔爾投資咁多搞場大龍鳯，但落場隊波演出差勁，不堪一擊，資源分配點解唔平均啲呢？

荷蘭雖然冇乜料到，但最後一戰對卡塔爾，和波都出線，仍然係穩入16強，但以目前演出，前景的確唔樂觀。塞內加爾有3分，最後一戰必需要贏厄瓜多爾，先可以反先出線。