'

【世盃賽後】英超明星隊 2蛋贈塞爾維亞!巴西8鋒將輪流落場 李察利臣翻身 尼馬受傷爆喊

超幸福陣容,唔恨得咁多喇!世界盃G組賽事,巴西兩蛋贈塞爾維亞,開出上屆對賽翻版波膽,期間巴西用晒8大鋒將,演練兩套進攻組合,去到尾段仲越踢越順,李察利臣射入半車身金球,贏盡掌聲,遺憾係尼馬被瘋狂招呼,被調離陣後喊晒口,未知傷勢如何。

巴西唔單止粒粒皆星,而且佢哋無論球風、跑動等都融合得好好,正選陣容,由艾利臣比加把守大門,柏基達拍卡斯米路做第一道屏障,尼馬墮後一格校炮,前面三叉戟係李察利臣、拉芬夏同雲尼斯奧斯祖利亞。值得一提,巴西呢個正選11人當中,有5人來自英超。

塞爾維亞排出近似5311陣式,杜辛華荷域先列後備,希望守住1分再偷襲。上半場,塞軍主帥史杜高域個算盤都打得響,巴西一直無從入手,換邊後,真正戲肉開始。

巴西除咗繼續有耐性咁攻,最重要係加快咗速度,辛度曾經有球遠射中柱,冇幾耐後,雲尼斯奧斯攻門被擋出,李察利臣門前執雞成功,打破僵局。

巴西陣容極度豪華。

之後巴西越踢越順,攻勢不斷,73分鐘,李察利臣接應傳中,佢先將個波的高,然後再射個半車身靚波,2:0搞掂。今季喺英超仲未為熱刺入過波嘅李察利臣,去到國家隊變另一個人,近7次為巴西披甲入9球。

巴西主帥迪堤善用手中每一張王牌,之後將尼馬、李察利臣、雲尼斯奧斯同拉芬夏收起,先後換入洛迪高高斯、加比爾捷西斯、安東尼同馬天尼利,兩套進攻組合各有特色,最重要係極度豪華、相當誇張。

巴西今場演出幾近完美,唯一遺憾係尼馬今場足足被侵犯9次,踢到足踝腫晒、被調離陣,返到後備席更忍唔住喊,暫時未知傷勢如何。

全取3分後,巴西目前排G組榜首,次席為同得3分嘅瑞士,兩軍下場就會對壘,開波時間為下周二凌晨12點。至於0分嘅塞爾維亞、喀麥隆,就會喺下周三晚6點展開生死戰。