【世盃賽後】老馬庇佑！美斯一劍封喉 阿根廷2:0挫墨西哥 爭出線決戰羅拔仔！

球王自救！攻門機會唔多，但美斯一個刁鑽射門，加上「新華朗」安素費南迪斯入世界波，阿根廷周日凌晨2:0挫墨西哥，重燃出線希望，C組最後一戰對波蘭，美斯決戰羅拔利雲度夫斯基。

比賽前一日，係馬納當拿逝世兩周年忌辰，美斯話必需贏波，保持出線機會，唔想令永遠偶像失望，結果佢做到咗，決賽周入球累計8球，出場21次，剛好追平老馬紀錄。

比起首仗爆大冷輸畀沙特，阿根廷今戰陣容作出5個改動，包括用曼聯中堅利辛度馬天利斯打正選，前面仍倚靠美斯、迪馬利亞、拿達路馬天尼斯。

墨西哥有備而來，一開波即全場緊逼，以體力及狠辣踢法，令阿根廷無法施展攻勢，頻頻斷䌫。美斯被嚴密看管之外，3個中場隊友硬凈有餘，進攻配合度極低，完全做唔到同前線連繫嘅工作，加上球王活力亦唔夠，掂波機會都好少。

經過搏甩肺嘅上半場，墨西哥壓迫力度減弱，防線亦開始縮後，美斯得到較多空間，64分鐘得到全場唯一射門機會，地波角度刁鑽，「Sam哥」奧祖亞鞭長莫及。

安素費南迪斯，21歲，効力賓菲加，極有潛質嘅攻擊中場，踢法近似華朗，下半場後備入替做到嘢，87分鐘接應美斯傳交，禁區邊射遠柱，再次收死奧祖亞，為阿根廷鎖定勝局，取得3分，最後一戰對波蘭。

精華傳送門： https://youtu.be/fMtITKun5dU

羅拔利雲度夫斯基入球無數，但取得個人決賽周歷來首個入球，令沙場老將難忍英雄淚。波蘭憑佢一傳一射，2比0挫沙特阿拉伯，出線有價講。

沙特爆完驚天大冷，連阿根廷都贏得，對波蘭更勇於主攻，雖然佔據主動，但後防亦露出唔少空位，啱晒波蘭打反擊。

上半場39分鐘，羅拔仔送出助攻畀拿玻里嘅施連斯基近門抽入。下半場波蘭更多入波機會，楣柱各中一後，羅拔仔82分鐘乘對手失誤，單刀射成2比0。

連埋上屆，羅拔仔參加5場決賽周賽事，終於取得首個入球，艱辛得來，終於解脫，即使身經百戰，羅拔仔入波後流住涙慶祝，場面感人。世盃決賽周，由首屆至今仗，羅拔仔呢個入球，係第2600個，達到另一里程碑。

形勢混亂，先睇積分表

最後一戰波蘭對阿根廷、沙特對墨西哥，只有波蘭有條件和波，其他3隊首先都要爭取攞晒3分，再睇另一仗戰果。