日本爆完又爆！E組首仗反勝德國，創造奇跡之役嘅日本，次輪喺被全世界睇好情況下，0:1不敵哥斯達黎加。領隊森保一上仗使出神之調動，備受讚賞，但今場處理太保守，要為輸波負責。
同反勝德國比較，日本陣容作出5個變動，收起酒井宏樹、欠保建英、前田大然等，入波功臣堂安律、相馬勇紀、守田英正、山根視來做正選，仲有單箭頭上田綺世，依然係保守陣式。
今仗對手明顯較弱，日本如果肯全場主攻，攞多3分，出線機會即高唱入雲，特別對德國下半場嘅強攻陣式，擺明極有威力。但森保一話舊招唔怕用，開波仍收起最有侵略性嘅三苫熏、淺野拓磨、南野拓實，睇定嚟踢，依家衰咗，必定要負責任。
日本上半場攻勢疲乏，欠缺威脅；哥斯達黎加吞西班牙7蛋後，表現有改善，逼搶積極，同日本拉成均勢，但攻力亦不足，令上半場攻門鏡頭寥寥可數。
又係㩒制時候，日本打半場保守波，領隊森保一換邊後，即變陣主攻先以淺野拓磨取代上田綺世，伊藤洋輝入替長友佑都，增加左路側擊力，加快推進速度，壓住哥斯達黎加進攻。三笘熏、伊東純也兩個攻擊球員，亦短時間內被調入場，組織總攻擊。
但面對密集防守，日本弱點再次暴露，前場好叻打突擊，但強攻能力弱，始終老鼠拉龜。入波唔成，反而喺81分鐘失守。
吉田麻也、伊藤純也解圍唔夠清脆，畀哥斯達黎加後衛富勒，有機禁區外起腳，省中吉田麻也彈高，門將權田修一唔係單手救高波，反而出齊雙手，咁梗係差些少，掂到個波都入。呢個亦係哥斯達黎加踢咗兩場分組賽，唯一中框射門。
落後下日本出埋南野拓實，全力反攻，最有威脅始終係三笘薰，左路多次策動攻勢，但時間有限，硬攻能力不足，最終由天堂跌落地獄，喺哥斯達黎加身上全失3分。
E組第二輪未上演西班牙對德國前，日本、哥斯達黎加、西班牙同得3分，如果德國贏波，4隊將以同分姿態，進入最後一輪決戰。
