今屆決賽周，比利時平均年鹷最高，F組首仗面對活力強勁嘅加拿大，全場捱打，夏薩特預咗冇料到，連奇雲迪布尼都冇釐神氣，最終險勝1:0，真係大話夾好彩。
比利時黃金一代上屆成為季軍，奇雲迪布尼、夏薩特、維頓漢等繼續出征，中鋒盧卡古今仗因傷被收起，由巴舒亞伊做正選。
加拿大第2次參加決賽周，佢哋近年進步神速，雖然賽前被睇低，但上半場反而佔有壓倒性優勢，以速度壓制平均年齡達30歲181日嘅比利時。拜仁球星艾方素戴維斯領導前線，開波32分鐘攻門次數竟然高達12次，係加拿大上次參賽（1986年）之總和。
艾方素戴維斯9分鐘更得到射12碼機會，但被高圖爾斯撲出，加拿大錯失多個入球機會，反而喺44分鐘失守。中堅艾達韋列特放出靚長傳，劏開對方手中路防線，巴舒亞伊接應射入，令處於劣勢嘅比利時領先1:0。
加拿大射失極刑，係全場關鍵，以雙方全場表現睇，加拿大如果先開紀錄，比利時絕對唔易追。加拿大下半場繼續壓住狂攻，但最後埋門仲欠火喉，最終仍輸0:1，的確好唔抵。
F組另一仗，克羅地亞0:0和突尼西亞，睇過晒4隊表現，其實非常平均，特別比利時相當唔掂，加拿大有黑馬本色，呢組仍存在相當多變數。
比利時首仗令人失望，夏薩特等主力真係老咗，完全唔夠活力；但另一支歐洲強隊西班牙極富朝氣，18歲加維、19歲柏迪擔綱中場，兩個巴塞隆拿後生仔，首度登上世界盃舞台，都有出色表現，加維更取得入球。
E組首仗日本爆大冷，但哥斯達黎加唔止冇得爆，仲畀西班牙大炒7:0。哥斯達黎加固然冇攻力，全場零射門，防線亦鬆散到極，速度體力都唔夠，畀西班牙搓到暈。
龍門基羅拿華斯，喺聖日耳門長居後備，返到國家隊即吞7蛋。費倫托利斯梅開二度，丹尼爾奧莫、馬高阿辛斯奧、加維、卡路士蘇拿、艾華路莫拉達各入一球，西班牙贏出有如熱身賽嘅首輪分組賽。
E組第二輪，周日下午6時，日本對哥斯達黎加；周一凌晨3時德國大戰西班牙，如果德國再輸，已可宣佈提早玩完。
