麥總只要專注番踢波，其實係好勁嘅！世界盃第3場16強賽事，法國憑基奧特打破悶局、以及麥巴比梅開二度，輕鬆以3比1擊敗波蘭，昂然殺入8強。基奧特建功後，正式超越亨利成為法國史上入球王，而麥總連埋今場呢兩個入波，今屆已斬獲5球，刷新埋多項紀錄，夠晒威水。
法國上場出副選，最終輸畀突尼西亞，今場嚟個大變身，用番晒主力出擊，基奧特正中鋒，麥總、奧士文尼迪比利、基沙文支援，波蘭繼續靠一前一後抗敵，前面羅拔利雲度夫斯基，門神施捷斯尼。
冇計，法國質素真係贏晒、冇得傾，上半場一路控制戰局，不過麥總勁射中網側、基奧特遲一步鏟射，觀迪、曹亞文尼遠射等，都逃唔過施捷斯尼十指關。
波蘭唔係完全冇機會嘅，38分鐘，施連斯基連環抽射，畀法國門將洛里斯撲出，之後卡明斯基再抽，又畀華拉尼救空門。
法國大難不死，終於喺完半場前，由基奧特一控一抽，攞遠柱入網，法國1比0。而基奧特亦憑呢球波，打破亨利紀錄，成為法國史上入球王。
下半場，法國繼續控球在腳，波蘭整體質素相距太遠，想狂攻亦有心無力，一直悶到74分鐘，麥總接應橫傳，狂抽入網，法國2比0。
拎到燕梳球後，法國節奏更慢，但估唔到麥總喺補時階段，喺禁區內再抽入靚波，3比0，計埋呢兩球波，麥總今屆入咗5球，喺射手榜領放，上屆佢入4球，合共9個世界盃入波，令佢超越一眾傳奇例如馬勒當拿、施丹、亨利同埋C朗等等，拍住美斯，但美斯踢咗5屆世界盃，而23歲嘅麥總，只係踢咗兩屆。
補時階段，波蘭有球12碼，羅拔利雲度夫斯基又射失，但由於射門前洛里斯出咗白界，發還重射，今次終於羅拔冇甩拖，最終法國以3比1贏波入8強，對手會係英格蘭對塞內加爾嘅勝方。
