'

【世盃賽後】最流A組 荷蘭塞內加爾出線 卡塔爾包大尾 咁就駛咗1萬8000億!

A組,被大部份球評家認為水準最低,打完3輪分組賽,荷蘭2勝1和首名出線,塞內加爾2:1擊敗厄瓜多爾,次名晉級16強。卡塔爾3戰全敗,不堪一擊,被封史上最水皮主辦國。

荷蘭最後一戰,以2:0擊敗卡塔爾,之前係贏塞內加爾、和厄瓜多爾。雖然屬大熱首名晉級,但荷蘭呢3場波表現,真係平淡到極點,攻力不足及攻勢迂迴,如果唔係抽到好籤,放喺對手平均實力最弱嘅A組,荷蘭隨時出唔到線。

今仗對住弱爆嘅卡塔爾,出埋迪比做正選,荷蘭前線都冇乜大改善,又係靠加普開紀錄,呢位大紅人射入決賽周第3球,仲要3球分別由頭槌、左腳及右腳轟入,相當全面。另一個入球來自法蘭基迪莊,亦全靠卡塔爾後衛犯超低級錯誤,先至可以淨勝兩粒。

即使係主辦國,賽前除咗佢哋自己國民,冇乜人對卡塔爾有期待,但都估唔到渣到咁。同組對手已經唔算太強,結果3場輸晒,失7球只入1球,更大鑊係表現完全唔夠班,枉做決賽周東道主。

最屎東道主。

卡塔爾為今次賽事,瘋狂耗資2,290億美元(近1萬8,000億港紙),堪稱人類歷史創舉。但由申辦開始,到決賽周展開前,醜聞及爭議性事件不斷發生,令該國世界形象嚴重受損;去到最終比賽,球隊唔單止冇為國家挽回面子,反而成為魚腩,嚟緊仲要為球場等大型基建執手尾,呢1萬8000億,真浪費!

有意境。

至於另外兩支球隊厄瓜多爾及塞內加爾,進行殘酷決戰,塞內加爾今仗發揮超水準,兩度領先下,憑伊斯美拿沙亞及隊長高列巴尼建功,以2:1力挫厄瓜多爾出線。

荷蘭16強會對B組次名、塞內加爾對B組首名,邊隊會對英格蘭?一陣自有分曉。

A組
荷蘭3210517
塞內加爾3201546
厄瓜多爾3111434
卡塔爾3003170
厄瓜多爾慘情出局。