一戰功成，名留青史！最峰迴路轉決賽，阿根廷藉互射12碼擊敗法國，第3度成為世界盃冠軍。35歲美斯，藉個人決賽周最後一戰，完成輝煌足球生涯最後一塊拚圖，球王歷史定位，終於睇齊比利、馬納當拿。
今場決賽，阿根廷法定時領先過兩球，但被追和2:2，加時再領先又被追和3:3，最終憑互射極刑贏4:2。
美斯第5度參戰決賽周，堅持不放棄，雖然首仗爆冷不敵沙特阿拉伯，但同一班年輕隊友越戰越勇，終於修成正果。
麥巴比原本有機會以23歲之齡兩奪冠軍，完成球王世代交接，但完場笛響起後，呢位年輕球王只能旁觀聖日耳門隊友，步上莊嚴神壇，但麥巴比決賽大演帽子戲法，勇奪金靴獎，盡顯卡士，未來係佢世界。
今仗雙方陣容，法國出番拉比奧特，同基沙文、曹亞文尼合拍中場；阿根廷領隊史卡朗尼，相對出人意表，用番迪馬利亞做正選左中場，佢亦以優異表現，回報領隊信任。
賽前有消息，指法國唔少主力染上感冒，今仗接戰，球員精神面貌確實有問題，完全唔及阿根廷，感覺非常疲倦，跑動好慢，處處受制，完全唔似樣。
阿根廷攻勢旺盛，特別迪馬利亞左路極大威脅，23分鐘，天使突入禁區，同奧士文尼迪比利有接觸，球證判罰12碼，美斯主射12碼破網，取得個人今屆第6球。
36分鐘，阿根廷增添紀錄，美斯中場策動快攻，阿歷斯麥阿里士打中路突破，傳畀迪馬利亞單刀射入，阿根廷領先至2:0。
法國上半場未完，換走欠缺動力嘅基奧特、奧士文尼迪比利，調入馬古斯杜林、高路梅安尼，但對整體冇乜幫助；最失望仲係麥巴比，完全冇腳好波，直至70分鐘，先至為法國取得全場第一腳射門。實際原因為何，唔通真係感冒？
阿根廷下半場依然佔盡優勢，有多個入波機會，但未能再有進賬。法國71分鐘以卡馬雲加、京士利高文，代替基沙文、靴奧費南迪斯，增加活力及對抗性，加上阿根廷後防鬆懈，竟然兩分鐘內出現大逆轉。
80分鐘，法國迫得12碼，麥巴比主射破網；兩分鐘後，京士利高文中場成功攔截美斯，發動一個美妙配合，麥巴比禁區邊臥射得手，追和2:2。阿根廷80分鐘全面控制戰局，但以為勝券在握，兩分鐘內徹底失陷，令賽事進入加時。
阿根廷真係唔縮得，加時換入拿達路馬天尼斯，又再取得優勢，製造多個危險攻門，108分鐘，美斯藉門前混戰，右腳執死雞射成3:2。
以為大局巳定，真係峰迴路轉，118分鐘麥巴比射門，阿根廷犯手球又輸12碼，麥巴比主射得手，大演帽子戲法，8個入球肯定得金靴奬，亦令比賽要互射12碼。
法國曹亞文尼、京士利高文宴客，阿根廷贏4:2，繼1978、1986年後第3度奪世界盃，以決賽整場表現，係值得成為冠軍。美斯、麥巴比兩代巨星，亦各自呈獻自身最高水準，合組一場令人難忘決賽。
美斯亦成為決賽周最佳球員，達米安馬天尼斯今仗加時尾段擋出必入波，又救出一個12碼，當選最佳門將實至名歸，阿根廷中場安素費南迪斯成為最佳年輕球員。
