荷蘭率先過關！今屆世界盃第一場16強淘汰賽，以A組首名出線嘅荷蘭，以3比1擊敗美國，領隊尹戈爾近11場世界盃賽事法定時間未輸過，繼續刷新紀錄！
荷蘭賽前傳出大軍集體爆流感，但從正選陣容所見，迪比、加普、法蘭基迪莊、杜費斯等主力俱在陣中，或者係煙幕居多。荷蘭今場繼續排出3中堅陣式，添巴、雲迪積克、阿基扼守中路，一對翼衛係杜費斯同白蘭特；至於美國隊長基斯甸普列錫亦趕及傷癒，正選登場。
咪齋睇比數以為美國捱打，其實美國先係主動進攻嘅一方，開賽初段普列錫更有球單刀，可惜畀荷蘭長人門神諾柏擋出。
荷蘭今場大踢穩守反擊戰術，美國主動進取，就更正中下懷，上半場10分鐘，今場表現極度搶鏡嘅杜費斯，喺右路地波傳中，迪比撞射得手，1比0。
荷蘭領先後踢得更小心，睇準機會先出擊，幾乎全隊都喺晒後場等你攻，美國基本上係打唔入，上半場補時，荷蘭再次複製第一球，又係杜費斯，但今次撞射得手嘅係白蘭特，2比0。
下半場，美國有雷拿落場，但荷蘭防守真係堅穩，美國始終都搵唔到機會，以為荷蘭會悶悶哋咁贏之際，去到76分鐘終於有啲漣漪，普列錫傳中，後備入替嘅胡禮撞到個波，笠死諾柏，追成1比2。
之後美國繼續急攻，荷蘭一眾老手又出擊，81分鐘，杜費斯射成3比1，美國出線夢徹底幻滅。
連埋今場，方丈近11場世界盃賽事，法定時間錄得8勝3和，從今場荷蘭嘅表現所見，佢哋嘅防反戰術極度煞食，嚟到淘汰賽絕對係大派用場。
荷蘭殺入8強後，對手將會係阿根廷對澳洲嘅勝方，而比賽將於12月10日凌晨3點開波。
