'

【世盃賽後】數據拍住麥總!般奴夠弗入兩球 2:0挫烏拉圭!葡萄牙入16強 會唔會放生南韓?

H組第2輪,葡萄牙由般奴費南迪斯入兩球,2比0挫烏拉圭,兩戰兩勝,繼法國、巴西後,成為第3支打入16強球隊。同組南韓2:3負加納,最後一戰必需贏葡萄牙,先至有機會出線。

葡萄牙首輪贏加納,執多場就晉級16強,所以唔會好似日本咁笨實,幾大都出主攻陣,搏唔到仲有3分喺手,而且最後一輪對南韓,形勢始終有利。

除咗C朗同祖奧菲歷斯,般奴費南迪斯都推得好前,仲有魯賓尼維斯、貝拿度施華壓上,非常進取。形勢上係佔優,但受制於烏拉圭硬淨防線,上半場近70%控球權之下,冇出現過一個中目標射門。

烏拉圭上仗和南韓,蘇亞雷斯表現最差,今場要做後備,由卡雲尼取代,同達雲紐尼斯合作攻堅。上半場穩守突擊做得唔錯,防守硬朗又夠辣,前面有威脅,黃金機會出現喺33分鐘,熱刺中場賓坦古亞帶波殺入禁區,連過兩名後衞,面對門將迪奧高哥斯達,但射門被後者神勇撲岀。

下半場開波,烏拉圭防線冇之前逼得咁緊,鬆一鬆就出事。54分鐘,般奴費南迪斯左路似射又似傳,C朗攝前跣頂,但其實掂唔到個波,就咁飄向遠柱入網。

烏拉圭一對正選前鋒欠表現,特別達雲紐尼斯,都真係幾冇建樹,佢同卡雲尼稍後同時被換出,調入另一對前鋒蘇亞雷斯、麥斯高美斯。

効力特拉布宗嘅麥斯高美斯,出場冇耐勁射中柱,認真慘情,牙蘇近門混戰中亦射中網側,烏拉圭反攻唔成,完場前因手球輸多個12碼,般奴費南迪斯射成2:0,葡萄牙兩戰兩勝入16強。

般奴暫時表現好搶鏡,進攻上比C朗更具威脅,首仗已有兩個助攻,兩場加埋製造4個入球,數據上佢同麥巴比暫時領先。

威水!

烏拉圭呢兩場波都唔係踢得差,今場一次疏忽,就失咗好關鍵嘅第一球。三大前鋒的確冇貨交,令球隊兩場零入球,但計埋亦有3球中柱中楣,運氣差咗啲。

最後一輪,只得1分嘅烏拉圭對加納,必需要攞晒3分,再睇南韓對葡萄牙戰果先知可唔可以出線。南韓同樣1分,形勢相同,都係要贏葡萄牙至有價講。

H組
葡萄牙2200526
加納2101553
南韓2011231
烏拉圭2011021