真正雖敗猶榮！世界盃4強大戰，法國火併摩洛哥，法國賽前被睇高一線，但踢落完全係五五波，法國最終憑菲奧靴南迪斯一個靚車身，喺上半場奠定1比0勝局，晉身決賽，麥總鬥美斯，為今屆世界盃合演夢幻大結局。
法國今場繼續由基沙文墮後踢8號位，正中鋒基奧特，左右翼仍然係麥巴比同奧士文尼丹比利，不過中後防就執咗少少，中堅干拿迪代替烏柏美卡奴，而科芬拿就取代有傷嘅拉比奧特踢正選。
摩洛哥受傷兵困擾，今仗改踢5人防線，可惜上半場21分鐘隊長中堅沙爾斯又受傷，要由中場艾馬拉入替，再次變番4人防守，右邊由夏基美同薛耶治牽制麥巴比。
不過法國又點止一個麥巴比，上半場開賽僅5分鐘，今屆大放異彩嘅基沙文落底傳中，麥巴比起腳省中摩洛哥守將，個波彈高咗兼去咗左邊，左閘菲奧靴南迪斯嚟個車身射門，彈一彈地收死咗邦奴，法國先開紀錄。
呢個士哥，亦係自1958年巴西對法國後，4強戰最快嘅入球，當時巴西華華兩分鐘打開紀錄。去到17分鐘，科芬拿後場長傳，基奧特喺左路單刀，但射中柱彈出底線，未能增添紀錄。
以為摩洛哥齋防反，一落後就唔識攻，法國會大勝一場？錯晒，摩洛哥並冇散到，繼續組織進攻，令法國門前有唔少險象，當中守將艾耶美一個靚倒掛中柱，相當唔抵，但已令法國防線響起警號。
換邊後迪甘斯見唔對路，法國即稍為拖慢節奏同縮後，但摩洛哥喺下半場攻勢頗為猛烈，可惜法國一對中堅華拉尼、干拿迪表現出應有水準，瓦解咗唔少攻勢，尤其係干拿迪包位一流，令摩洛哥無計可施。
法國掉番轉專心打防反，去到79分鐘，麥巴比又喺摩洛哥禁區內舞龍、仲要起埋腳，個波去到啱啱落場嘅高路梅安尼腳下，呢位法蘭克福前鋒輕輕一掃，第一腳掂波就建功，法國贏到2比0，順利殺入決賽鬥阿根廷。
麥巴比目前同美斯同得5個入球，喺神射手榜並駕齊驅，法國同阿根廷嘅夢幻決戰，將直接決定今屆冠軍、神射手誰屬。法國可唔可以繼1962年巴西後，成為第二支成功衛冕冠軍嘅球隊？定還是美斯封神、一圓世盃夢？星期日晚11點，麥總、美斯，命運揭盅！
