連續兩晚，東亞足球創奇跡，南韓於落後一球劣勢下，補時階段孫興民突然爆發，妙傳後備奇兵黃喜燦奠定勝局，2:1反勝葡萄牙，以較多入球壓倒烏拉圭，次名出線。
南韓入16強，除咗自己球員努力，亦要多謝加納，因為佢哋對烏拉圭只輸0:2，只要再輸多一球，就會係烏拉圭出線。H組最後成績，葡萄牙6分首名，南韓、烏拉圭同得4分，得失球差亦相同，計總入球南韓贏4:2，次名晉級。
葡萄牙賽前已肯定出線，今仗收起大量中前場主力，但仍然有C朗，畀佢增加入球做神射手嘅機會。
南韓贏先至有價講，但主力中堅金敏哉因傷缺陣，仲喺開波5分鐘，被列卡度賀達先開紀錄。南韓出埋李康仁做攻擊中場，等孫興民有較多支援，「紅色轟炸機」曹圭成繼續高空轟炸，27分鐘接應角球製造混戰，金英權近門射入扳平。
C朗嘥咗兩個機會，下半場中段被換出；南韓盡地一煲，連有傷前鋒黃喜燦亦要搏殺，但形勢仍陷於被動，冇乜危險攻門，睇住要執包伏返屋企。
但去到91分鐘，一直表現低迷嘅孫興民，終於做場好戲，策動快速反攻，放出靚直線，狼隊前鋒黃喜燦狂奔幾十碼，禁區邊完成一個完美反擊。南韓盡己所能，反勝2:1，跟住等命運之神宣判。
加納雖然輸波，但完成另類復仇，硬係唔輸多球，攬住烏拉圭一齊死。2010決賽周8強，又係加納對烏拉圭，蘇亞雷斯加時完場前，蓄意手球救空門，但加納基恩12碼宴客，之後互射極刑更被烏拉圭淘汰。
12年後再碰頭，當年加納國腳只有安祖阿休仍然在陣，並喺21分鐘有射12碼機會。但天意弄人，阿休竟然宴客，仲喺26同32分鐘，畀烏拉圭中場迪阿拉斯卡達連入兩球。
烏拉圭只要贏3:0，就可以食住南韓，但加納繼續強攻，門將薛治更屢救險球，加上兩個爭議性判決，球證冇畀12碼烏拉圭，烏拉圭自己又唔爭氣，加納最終成功攬炒，最後一次參加世盃嘅蘇亞雷斯，喊到收唔到聲。
南韓16強對手，九成九係巴西，下周二凌晨舉行，仲有冇得爆？葡萄牙周三凌晨會對H組次名。
