頂你，話我打假波！世界盃揭幕戰，厄瓜多爾打破收錢放水傳言，王牌射手安拿華倫西亞包辦兩個入球，喺A組第一輪以2:0擊敗主辦國卡塔爾。
卡塔爾負責踢揭幕戰，一早已引起好多批評，為遷就呢個有錢主辦國，犧牲球迷福利。事實上，以佢哋今場表現，完全係浪費一場揭幕戰。
好在賽前有無盡花生剝，場波先至有番啲話題，因為著名記者Amjad Taha爆料，話主辦國卡塔爾用740萬美元，收買咗8名厄瓜多爾球員，內定卡塔爾下半場入波贏1:0。
咁猖狂？總有人唔執輸，幾大買番啲先。卡塔爾主勝，由開飛3.8倍，落到開飛得2.92倍，卡贏1:0波膽，亦只得5.9倍。
但一開波，厄瓜多爾即反客為主，瘋狂搶攻，3分鐘王牌前鋒安拿華倫西亞已頭槌破網，但VAR聲稱越位在先。
卡塔爾係亞洲盃冠軍，但拍埋厄瓜多爾度，速度同技術都輸晒，班底弱加心理壓力大，上半場基本上全程捱打，輸兩粒已算少。
16分鐘，安拿華倫西亞高速單刀，畀對手龍門拉跌，呢位費倫巴治前鋒自己操刀，取得今屆決賽周第一個入球。31分鐘又係安拿華倫西亞，一個精彩頭槌，令厄瓜多爾半場領先2:0。
下半場仲大鑊，完全冇世界盃卡士，厄瓜多爾收晒韁，卡塔爾更一滴都冇，只得一腳射門，睇到班油王面如死灰。
卡塔爾最後輸0:2，下仗對塞內加爾，以今仗差劣水準，如果唔科水，前景非常唔樂觀，隨時會成為史上最差主辦國。A組周二凌晨會上演塞內加爾對荷蘭。
安拿華倫西亞多得對手弱，揭幕戰做主角，佢已經32歲，2014-2017年球季，効力過韋斯咸、愛華頓，一直踢唔起，之後離開英超聯賽，先去墨西哥堤格雷斯，現時効力土耳其費倫巴治。
即使唔係効力大會，年紀亦偏大，安拿華倫西亞依然係厄瓜多爾王牌，如果唔係開波食詐胡，今場已經連中三元，神射手都有得叫胡。但佢下半場尾段傷出，希望唔影響之後上陣。
