爆冷！奪標大熱巴西玩完！8強戰法定時間和0:0，加時先入波都畀克羅地亞追和1:1，互射12碼輸2:4。進攻足球再一次輸畀防守足球。
克羅地亞打法的確唔算積極，但連續兩仗捱到互射12碼再贏埋，班波確係有韌力，4強戰對荷蘭或阿根廷，有本事就繼續再賽和對手，玩最擅長嘅互射12碼。
全場14次射門，12次中目標，巴西只入1球，對面唯一一次射中龍門就入波，都好難怪得晒巴西，只能夠講，加時下半場1球領先都唔加強防守，以為必勝，結果輕敵下中招，又要等4年。
巴西上場踢出森巴足球風格，全攻陣大勝南韓，嚟到8強唔會變陣，繼續李察利臣、拉芬夏、雲尼斯奧斯3前鋒，尼馬後面策動支援。
但克羅地亞又點同南韓，上仗踢得走日本，當然要繼續控場玩巴西，上半場又畀佢達成目標，中場波索域、高華錫主力掃波，跟住有莫迪歷控球在腳，拖慢節奏，令巴西上半場冇辦法組織有效攻勢，雖然有3次射門中目標，全部隔靴搔癢。
下半場巴西嘗試加快進攻速度，亦換入安東尼、洛迪高高斯，轉變兩翼模式，危險攻門的確增多，但克羅地亞門將利華古域出迎時間、封位技術真係一流，幾次瓦解巴西近射。保住不失。
細膩波唔掂，巴西後段換入法林明高高大中鋒柏度古靴美，代替李察利臣，增加衝擊力，但克羅地亞地波守到，高波亦唔怕你，咁就打完90分鐘，11點波又加時喇！
尼馬全場好努力，但一直被多人緊盯及侵犯，加時上半場補時1分鐘，佢決定放手一搏，中路強行突破，同盧卡斯柏基達做個靚撞牆，殺入禁區過埋龍門，跟住勁抽破網，終於打破悶局。
但巴西喺加時下半場，冇特別加強防守，仲走去搶攻，去到117分鐘，後防仍露出唔少空位，畀克羅地亞後備中鋒、効力薩格勒布戴拿模嘅般奴柏高域，禁區力射成1:1。
克羅地亞，全場唯一一次射中龍門就入波，艾力臣比加第一次落地撲救就輸波，又畀克羅地亞玩到互射12碼。
克羅地亞上場射12碼淘汰日本，睇到球員心理素質好強，結果真係4罰全中；巴西先有洛迪高高斯主射，畀利華古域撲出，最後馬昆奴斯哥利亞射中柱，巴西12碼輸2:4，首席大熱門被擯出局。
