周一晚世界盃A組賽事，塞內加爾同荷蘭拉成均勢，但冇咗沙迪奧文尼，缺失難以彌補，未能把握入波機會下，反而比賽末段連失兩球，以0:2落敗。荷蘭表現只屬一般，火力不足，能先取3分，老帥尹戈爾應記一功。
已經71歲，尹戈爾再次執教荷蘭後，保持11勝4和不敗佳績，呢位老帥克服癌魔之後，功力依然不減，今場又一例證。
雖然手上已無以往星光熠熠中前場，但有現時其中一條靠得住嘅後防線。今仗打532陣式，盡用自己最佳資源。3中堅VVD、尼敦阿基、迪歷特夠晒卡士，防守之餘，死球助攻亦有威脅，特別係VVD，幾次接應死球頭槌攻門，惜未能轉化為入球。
攻擊球員唔夠力，兩閘杜費斯、戴利白蘭特，反而係進攻泉源。特別國際米蘭嘅杜費斯，右路一個打晒，防守穩之外，更不斷發動攻勢，落底出波有質素，繼續球會嗰陣嘅優秀表現。
對手塞內加爾，雖然冇咗王牌前鋒文尼，但中後場堅有水準，體力速度俱佳，令法蘭基迪莊頗狼狽，車路士中堅高列巴尼亦夠穩陣，可以同荷蘭拉成均勢。
上半場雙方射門機會相若，但欠高質前鋒之下，未見有大威脅；下半場前及中段，荷蘭埋門機會更少，特別係一對正選前鋒，雲遜贊臣及貝雲積幾乎隱形；反而塞內加爾反攻更有威脅，3次射中目標，都被首次代表荷蘭嘅門將洛柏治救出。
洛柏治都好傳奇，之前藉藉無聞，2019年仲打緊意乙，今季加盟海倫芬，9月至首度入選國家隊，未出過場，估唔到第一次為荷蘭上陣，就係世界盃決賽周，仲要成為贏波英雄之一。
尹戈爾後段㩒制，換走兩名前鋒，派剛傷愈嘅迪比上陣，亦將中場加普推前。變招果然奏效，84分鐘法蘭基迪莊傳中，加普入楔時間啱啱好，頭槌頂破僵局；補時階段，趁對手空群反攻，迪比近射，車路士門將艾度亞文迪撲出不遠，後備攻擊中場卡拉臣補中，射成2:0完場。
呢兩隊喺A組，無疑實力較強，荷蘭先過呢關，晉級已無難度，但要改善攻力，先可以走更遠。開紀錄嘅加普今年23歲，効力燕豪芬，上季荷蘭足球先生，曼聯都對佢有興趣，今仗踢得太後，往後可以加強其進攻角色，會增加唔少入球本錢。
塞內加爾全失3分，相當唔抵，論表現起碼應有1分，冇文尼當然影響致命，今場若果有佢，以下半場一段凌厲攻勢，真係好大機會有波入，贏埋都唔奇。
A組第2輪，周五晚9時塞內加爾對主辦國卡塔爾，周六凌晨零時荷蘭對厄瓜多爾。
