熱血！汗水！勝利！日本隊憑超強鬥志，無懼落後一球，擺出全攻陣進行大反擊，奇跡逆轉最終出現，以2:1反勝衰輕敵嘅德國，寫下日本足球最光輝一頁。
E組首戰，亦係德國領隊費力克首場世盃決賽周賽事，佢教拜仁慕尼黑時，攞過德甲、歐聯冠軍，今仗亦有5名拜仁戰將，包括紐亞、甘美治、湯馬士梅拿、基拿比及只有19歲嘅穆斯亞拿。
日本防線仍以兩大老將吉田麻也（34歲）、長友佑都（36歲）孭飛，另一正選酒井宏樹都32歲。單箭頭係効力些路迪嘅前田大然，久保建英、鎌田大地、伊東純也中場做支援。
開波後德國嘆慢板，反而日本全力緊逼，發動快攻，伊東純也右路快放有威脅，7分鐘當傳中畀前田大然近門撞入，但後者越位在先食詐胡。
德國穩定陣腳後，身體素質同技術始終佔優，開始控制戰局，有耐性地不斷轉邊，慢慢搓散日本防線，特別係RB萊比錫左閘大衞拉林，出擊能力超強，令日本右路防線幾近崩潰，吉田麻也、伊東純也完全睇佢唔住。
31分鐘，正正係走甩大衛拉林，畀佢近門有射門機會，門將權田修一出迎將佢踢跌輸12碼，根度簡射成1:0。德國之後仍有唔少射門機會，夏維斯補時近門射入，但越位食詐胡，未能擴大紀錄。
日本下半場首要改善防線，唔再多失，終於派富安建洋出場，代替欠缺表現嘅久保建英，用呢位阿仙奴球員，同吉田麻也、板倉洸打三中堅，酒井宏樹推前一格做右翼衛，變陣堵塞漏洞。領隊森保一放手一搏，稍後再換入白禮頓嘅三苫熏，同領隊森保一愛將淺野拓磨，再出埋堂安律及南野拓實，出晒所有前鋒，實行盡地一煲。
龍門權田修一連環撲救保不失後，日本全攻陣開始發揮效力，酒井宏樹近門炒高，錯失黃金機會後，75分鐘3個後備合力製造扳平入球，三苫薰出場後不斷交出靚傳，今次傳交南野拓實射門，紐亞撲出後，堂安律執死雞射成1:1。
德國有輕敵態度，中堅魯迪格一次同淺野拓磨鬥跑時，疑似擺出輕挑姿勢，有網民澄清魯迪格一向間唔中就會咁跑，但點都好，畀日本打起氣勢，去到82分鐘，淺野拓磨快速突破，半單刀下窄位射爆紐亞，反先2:1。
淺野拓磨今季因傷，喺波琴冇乜出場機會，森保一因為選呢位愛將入伍，受到口誅筆伐，今個入波，令將帥都大吐烏氣。呢個黃金入球，最終令日本成功爆冷，得到國家隊史上其中一個最偉大勝利。
費力克首次帶隊踢決賽周，即遇倒灶輸波，同組仲有西班牙，出線危機深重。德國上屆分組賽出局，最後一仗輸畀南韓，估唔到4年之後，第一仗又不敵東亞球隊，莫非係宿命？
