世界盃季軍戰，克羅地亞技高一籌，2:1力挫摩洛哥，繼上屆成為亞軍後，再次打入三甲，一個人口只得約390萬嘅小國，能得到咁勁嘅成績，實在難能可貴。
克羅地亞之成功，最關鍵人物當然係莫迪歷，兩屆決賽周都顯示世一指揮官風範。中場大師37歲，另一頂級老將比列錫33歲，將會係最後一次參戰世界盃，兩人可以自豪地告別呢個球壇最頂級舞台。
雖然兩隊喺晉級路上，都係以防守為主，不過季軍戰放開懷抱，近屆都偏向多入波，今仗亦不例外，同分組賽兩軍悶和嘅戰況，可謂差天共地。
兩軍主力如莫迪歷、比列錫、薛耶治、阿舒拉夫等都有上陣，全力爭取季軍榮譽。接戰至7分鐘，克羅地亞已開紀錄，罰球開出，比列錫頭槌二傳回中路，蒙面中堅加華度爾飛身頭槌破網。
只落後兩分鐘，摩洛哥已由達利扳平，又係來自一個頭槌。喺莫迪歷帶動下，克羅地亞攻守配合始終較好，控制住戰局，到42分鐘，左中場奧錫射入靚波，克羅地亞半場領先2:1。
下半場雙方體力下降，摩洛哥反擊稍欠威脅，最值得讚賞仍然係莫迪歷，經過決賽周多場苦戰，去到下半場依然唔慳力，配合攻守不停奔跑，打足90分鐘，為國家隊拚盡最後一分力量。
克羅地亞最終贏2:1，成為季軍，呢個歐洲小國除上屆及今屆締造佳績外，98年亦攞過季軍，當時有蘇加、波錫等巨星。莫迪歷、比列錫4年後應該已不在陣中，克羅地亞新一代，可唔可以延續輝煌呢？
摩洛哥以第4名過終點，係非洲球隊歷來最佳成績，而且淘汰賽分別淘汰西班牙、葡萄牙，絕對係一次輝煌演出，將記入世界盃史冊。
