尼馬受傷缺陣，巴西G組次輪對死守嘅瑞士，出齊兵器都咬唔入，末段要靠超級防中卡斯米路，殺上禁區建功，先至可以小勝1:0。呢個入波亦令巴西兩戰全勝，晉級16強。
巴西首仗輕取塞爾維亞，中鋒李察利臣梅開二度，演出醒神，但墮後做攻擊中場嘅尼馬受傷，一般估計由洛迪高高斯頂上，但結果係出費特洛迪古斯，同卡斯米路打雙防中；雲尼斯奧斯、拉芬夏左右翼，韋斯咸中場盧卡斯柏基達推上前一格，但佢始終都係較墮後，更近似打5中場。
冇咗尼馬，對巴西的確有影響，進攻創造力及後上射門明顯減弱，主要由右路拉芬夏策動，令瑞士密集防線較易應付，加上兩隊都有3分在手，最緊要穩陣，形成上半場欠缺攻門機會。
見攻勢咁呆滯，巴西換邊即以「新尼馬」洛迪高高斯入替盧卡斯柏基達，之後再出紐卡素中場般奴古馬雷斯，代替費特洛迪古斯，增加攻擊及策動能力。
調動後巴西攻力稍有改善，雲尼斯奧斯曾近射破網，可惜因越位而食詐胡，見強攻唔得，再派出技術流嘅加比爾捷西斯、安東尼，換走力量型李察利臣同拉芬夏。
幾乎出齊武器，最後入波唔係攻擊球員，係卡斯米路呀！老大哥見你班友搞極唔掂，82分鐘殺入禁區，藉瑞士後衞走漏，快腳抽射入網，為巴西打開紀錄。防守入波都係佢，30歲卡斯米路，越嚟越可愛。
巴西就係藉呢個入波勝出，2戰6分，繼法國後打入16強，最後一輪對喀麥隆可以畀尼馬繼續養傷，留力打淘汰賽。而最重要係，巴西呢兩場分組賽，防守都係滴水不漏，瑞士及塞爾維亞完全組織唔到，中目標埋門都係零。
相對巴西呢場，同組塞爾維亞、喀麥隆合演一場精彩激戰，打和3:3。卡斯迪列圖為喀麥隆先開紀錄，塞爾維亞上半場補時階段，由於查柏夫洛域治、米連高域沙域入波反先；富咸「米神」阿歷山大米祖域53分鐘射成3:1，以為大局已定，但喀麥隆以兩個漂亮快攻，由阿布巴卡、祖普莫亭破越位，追成3:3完場，今屆最後一場香港時間下午6時開波賽事，精彩收場。但呢個賽果，都打擊咗兩隊出線機會，兩敗俱傷。
G組除巴西，其他3隊仲有機會出線，3分瑞士最後一輪對只得1分塞爾維亞，將係激烈決戰，喀麥隆亦係1分，對已經出咗線巴西，會唔會偷到雞？
| G組 | 賽 | 勝 | 和 | 負 | 得 | 失 | 分 |
| 巴西 | 2 | 2 | 0 | 0 | 3 | 0 | 6 |
| 瑞士 | 2 | 1 | 0 | 1 | 1 | 1 | 3 |
| 喀麥隆 | 2 | 0 | 1 | 1 | 3 | 4 | 1 |
| 塞爾維亞 | 2 | 0 | 1 | 1 | 3 | 5 | 1 |
