哈利卡尼宴客，造就法國基奧特做英雄！世界盃最後一場8強賽事，上演英法大戰，法國由曹亞文尼及基奧特建功，以2:1淘汰英格蘭，卡尼射第一個12碼曾扳平1:1，可惜完場前嗰個唔入，未能再追和，英格蘭再一次與大賽冠軍無緣。
英格蘭對上一個大賽冠軍，仍然係講緊1966年嘅世界盃，多年無冠形成沉重壓力，面對球會隊友洛里斯，卡尼因為太熟路而再一次選擇勁Ban，可惜12碼一飛沖天，未能將比賽帶入加時。
卡尼今場入第一球12碼，令佢累積53個國家隊入波，追平朗尼，同列英格蘭史上嘅入球王，可惜呢個朵未能為佢帶來好運。
今場英格蘭繼續踢433陣式，前面係菲爾科頓、哈利卡尼同沙卡仔，中間由今屆表現極度出色嘅比寧咸壓陣，同迪勤懷斯、佐敦軒達臣鎮守，右閘基爾獲加將會直接單挑麥巴比。
至於法國踢4231，前面基奧特衝鋒陷陣，左右二翼係麥巴比同丹比利，基沙文墮後少少策應，中場中路曹亞文尼、拉比奧特則同比寧咸直接對決。
今場兩大高手過招勁精彩，停頓時間少，而且雙方都唔算保守，節奏明快，17分鐘，曹亞文尼喺近30碼外割草式遠射先開紀錄。落後嘅英格蘭踢法更進取，攻勢一浪接一浪，可惜梳爾、卡尼嘅射門，都逃唔過洛里斯嘅十字關。
換邊後，英格蘭攻勢更盛，喺52分鐘，沙卡終於博到曹亞文尼犯規，斬獲12碼，卡尼操刀一針見血。扳平後雙方節奏放番慢，以為又要睇加時，點知去到77分鐘，銀河唯一接應基沙文傳中，力壓麥佳亞頂入，2:1。
英格蘭蒙特、史達寧先後入替，喺完場前6分鐘，蒙特更博到12碼，可惜卡尼一飛沖天，注定英格蘭再一次同大賽無緣。法國晉級4強後，將會面對黑馬摩洛哥。
