【世盃賽後】勇而不茅真激戰！美國贏1:0晉級 伊朗永遠差一步 英格蘭首名對塞內加爾

傾盡所有，全場不停力鬥，美伊合演一場精彩決戰，結果美國險勝1:0，以B組次名晉級16強。伊朗第6度參戰決賽周，仍難逃分組賽出局命運。

球場事，球場了。美伊大戰前兩國雖然有好多紛爭，令氣氛異常緊張，但係雙方球員純粹技術比併，冇加辣味，值得尊重。

伊朗和都出線，美國必需贏波，亦憑藉球員年輕優勢，上半場以強橫體力壓住對手狂攻，多次埋門之後，38分鐘以一個靚組織先開紀錄。中場韋斯頓麥堅尼靚傳，右後衛達斯頭槌頂回中路，隊長普列錫近門撞入，美國領先1:0。

換邊後伊朗侷攻，變成另一個攻防戰，但美國球員始終保持良好體力，頂住對手狂攻濫炸，最終小勝1球，5分次名晉級。

伊朗只差一個入球就可出線，但始終攞唔到，佢哋上屆分組賽最後一仗對葡萄牙，補時最後階段錯失黃金機會，慘告和波出局，估唔到今次又係欠一球。

美國跟住會對A組名荷蘭，周六晚11時打響16強頭炮。首名英格蘭對A組次名塞內加爾，下周一凌晨3時開波。

英格蘭3:0大勝威爾斯，7分成為首名。英軍賽前形勢大好，和亦出線，唔大敗亦可過關，修夫基放心變陣，出佐敦軒達臣、拉舒福特、菲爾科頓、基爾獲加做正選，收起史達寧、美臣蒙特、捷比亞、布卡約沙卡。

換人效果唔錯，菲爾科頓、拉舒福特支援哈利卡尼，侵略性及直接攻門能力，比美臣蒙特、布卡約沙卡強，製造唔少威脅。

威爾斯實力所限，全程捱打，加里夫巴利、艾朗藍斯畢竟老矣，完全欠缺作用，防線上半場仲頂得住，換邊後進入潰敗狀況，畀拉舒福特梅開二度，菲爾科頓亦有進帳，最終淨勝3球。