唔止日本激情，伊朗一樣咁激！周五B組第2輪，伊朗球員大打爭氣波，憑藉出色表現，2比0擊敗威爾斯，亞洲球隊繼續強勢。
由沙特阿拉伯贏阿根廷為起點，跟住日本反勝德國，南韓賽和烏拉圭，再到伊朗以輾壓威爾斯，一洗上仗2比6慘負英格蘭恥辱，4支亞洲球隊展現強橫鬥志，技戰術完全唔輸蝕，令人激讃。
吸收上仗踢法過於被動、引致被英軍大炒教訓，伊朗開波全面圍搶，發揮高昂鬥志，大部份時間佔據主動。利華古遜前鋒阿斯蒙傷愈復出，發揮國家隊攻擊皇牌本色，對威爾斯後防構成極大威脅。
上半場雙方互交白卷，伊朗下半場攻勢大盛，令威爾斯全面捱打。52分鐘，阿斯蒙、哥列沙迪施射，同樣中柱，之後多次攻門亦差之毫釐，但絲毫未有影響伊朗球員爭勝決心。
威爾斯頂到86分鐘，門將軒尼斯出迎撞跌對手，被罰離場，伊朗藉多打一人，發動最後總攻，補時8分鐘，終於取得入球，後備捷舒米禁區外割草式射門，打破悶局，列沙伊安補時11分鐘射成2:0完場，伊朗全取3分，實至名歸。
威爾斯球員發揮差，完全唔及對手，加里夫巴利近乎隱形，連唯一王牌都咁曳，帶動唔起隊友，兩個字：抵輸！
B組伊朗2戰3分，最後一戰對宿敵美國，若能全取3分，即肯定歷史性打入世盃16強。威爾斯只得1分，只有擊敗英格蘭，出線先至有價講。
