'

【世盃賽後】亞洲球隊全滅!巴西4:1輕取南韓 展示完美攻擊教材 用埋後備龍破世盃紀錄

世界盃16強第6場賽事,南韓挑戰5屆世界盃冠軍巴西。巴西今場有尼馬復出,淨係一個上半場,已經展示到大家嘅差距,最終巴西以4比1大勝南韓,8強將會鬥克羅地亞,而今屆6支亞洲區球隊代表,亦正式宣佈全滅。

巴西陣容一貫星光熠熠,尼馬復出繼續做進攻中場,雲尼斯奧斯祖利亞、拉芬夏同李察利臣喺前面數胡,而南韓除咗有孫興民,亦有黃喜燦首踢正選,加強攻力爭取入球。

同上仗相比,巴西喺上半場盡顯鬥志,段段同你鬥衝鬥放,僅7分鐘,拉芬夏右路傳中,中間大漏,雲尼斯奧斯熨射搞掂,1比0。6分鐘後,李察利臣博到12碼,尼馬主射,冷靜地等南韓門將金成奎旭咗先起腳,2比0,尼馬成功開齋。

開賽僅13分鐘已經落後兩粒,不過南韓都冇縮,繼續嘗試谷前去攻巴西,其中有球黃喜燦超勁遠射,睇住直飛死角,可惜畀艾利臣比加救到。

由於南韓嘗試主攻,前面一斷,就有大量空間畀森巴兵反擊,29分鐘,李察利臣用個頭頂吓頂吓保護個波,然後交完即走位,堤亞高施華塞個靚直線,李察利臣搞掂,3比0,李察利臣瘋狂跳舞,仲走埋去後備席撩主帥迪堤一齊跳,相當風騷。第4球,都係反擊,雲尼斯奧斯傳中,柏基達撞射建功。

以為巴西會破紀錄瘋狂大勝,但真係要畀啲掌聲南韓,佢哋一直好努力咁搵機會破蛋,三線聯繫亦比上半場緊密咗好多。下半場一出嚟,孫興民就有個黃金機會,禁區內起腳,可惜畀艾利臣擋出。

之後拉芬夏、黃喜燦分別有起腳同勁射,但都未能製造入球,去到76分鐘,南韓終於由白昇浩遠射得手,成功破蛋,最終輸1比4,都算有交代。

值得一提嘅係,巴西喺80分鐘,用第三門將韋華頓入替艾利臣,成為世界盃史上第一隊用晒名單上26人嘅球隊。巴西晉級8強後,對手將會係上屆亞軍克羅地亞。