雖飲恨出局，惟希望不留遺憾，因為已拚盡所有！日本周一晚16強對克羅地亞，踢出水準，90分鐘及加時同上屆亞軍克羅地亞打和1:1，可惜互射12碼階段輸1:3，以最殘忍方式告別今屆世界盃舞台。
完場後，好多日本球員及球迷，都傷心流淚，領隊森保一即場開會，鼓勵球員。事實上，佢哋可以自豪告別，除擊敗過德國、西班牙兩支世界盃冠軍球隊，今仗亦交出水準，同克羅地亞相比，甚至有過之而無不及。
雖然連續兩屆16強階段被淘汰，繼上屆黑色4分鐘、完場前被比利時反勝後，今屆再次以悲情方式出局，始終未達8強目標。但只要有夢，繼續追尋，始終有圓夢一日。日本隊，4年後再見！
未開波前，最關心梗係森保一排乜陣。橋唔怕舊，最緊要受，逆轉勝德國、西班牙咁精彩，唔好畀佢停，出433陣式，前面有堂安律，但係拍鎌田大地同前田大然，三笘薰、南野拓實、淺野拓磨等強鋒都係收起先，連對西班牙奠定勝局嘅田中碧都係做後備。
日本未出最強攻擊手，但踢法絕對唔算消極，全場緊逼亦敢於進攻，開波只有2分鐘，中堅谷口彰悟出擊，近門頭槌施襲，僅僅斜出。7分鐘，另一守將富安健洋出現失誤，比列錫面對門將權田修一，但角度較窄，射門被撲出。12分鐘伊東純也右路傳中，前田大然搶前點臥射，但來遲一步。
克羅地亞中段曾佔據主動，製造唔少攻勢，但日本防守頂得住，之後再轉換節奏，爭取番控球權，利用伊東純也、長友佑都左右路進擊，去到43分鐘打開紀錄。
「馬納堂安」右路送出致命傳球，些路迪前鋒前田大然門前射成1:0。決賽周打到第4場，日本首度領先，進入下半場。
森保一繼續不停寫筆記，上半場竟然領先，大輪換奇招當然唔駛用住。克羅地亞地面進攻，處處被日本破壞，改用高波即扳平。比列錫55分鐘接應傳中，頂入死角靚波扳平。
莫迪歷62分鐘拉西射門極精彩，但被權田修一飛身撲出後，森保一見日本形勢較被動，立即㩒制，換入三笘薰、淺野拓磨，代替前田大然、長友佑都，再進行終極進攻。
克羅地亞畢竟老練，開始拖慢節奏，以穩陣控球為主，唔畀日本有瘋狂快攻機會，令賽事進入加時。加時雙方呈膠著狀態，保持1:1紀錄，要互射12碼分勝負。
日本南野拓實射先被救出，第二球三苫薰又宴客，兩球都冇力度冇角度，兩人都明顯緊張，受壓力影響。雖然淺野拓磨之後射入，但隊長吉田麻也亦宴客，日本射12碼輸1:3，慘被淘汰。効力薩格勒布戴拿模年輕門將利華古域，救出3個12碼，成為克羅地亞英雄，周五晚11時8強戰，克羅地亞將對巴西或南韓。
