荷蘭今屆世界盃表現只係一般，但就打起咗加普。呢位23歲嘅PSV翼鋒，今屆已經斬獲兩球，吸引到唔少豪門注意，當中包括曾經無限接近嘅曼聯。
其實早喺今夏，已經有傳坦哈格一上任就會斟加普，不過曼聯最終簽下嘅係另一翼鋒安東尼。加普懶理離隊不成，繼續做好自己、喺燕豪芬發光發亮，今季已有9個聯賽入球、12次助攻，無論喺荷甲射手榜、助攻榜都係一哥，相當誇張。
嚟到世界盃，加普每場都入一球，唔單止入波，間中仲會墮後幫手串連，的確相當搶鏡，各大每媒均報導，曼聯已重新檢視簽入加普嘅可能性。
不過，曼聯名宿舒寧咸話，目前紅魔最需要嘅係正中鋒，而唔係加普：「C朗已經離咗隊，我哋需要嘅，係一個可以主導攻勢嘅中鋒……我哋唔需要翼鋒又或者假 9 嘅技術型球員。馬迪爾、拉舒福特、辛祖都已經係呢類型，老實講，冇一個真正嘅 9 號仔，其實好唔着數。」
喺早幾年前，亦即tiki taka橫行嘅年代，假9陣式的確好惡、看似無孔不入，但隨住唔少球隊嘅防守體系改進，講求體力化、機動逼搶，令假9戰術難以徹底有效執行。
唔少球隊都返璞歸真，用番強力中鋒開路，球會級著名例子當然係拜仁，重新起用喀麥隆前鋒卓普慕亭，即火力全開，今屆世界盃更有一場經典，西班牙同德國，原本都係踢假9陣，但最終1:1，兩位入波嘅球員分別係後備中鋒摩拉達同富克洛。
身高達1米93嘅加普，恩師係雲尼斯達萊，雲佬由細睇到佢大，二人情同父子，雲佬有冇方法傳授番一招半式，令到加普唔單止踢翼，連踢中鋒都一樣咁掂？
